Yeni Günəşli qəsəbəsinin yolları niyə təmir edilmir? VİDEO

Ötən əsrdən bu yana Yeni Günəşliyə yaxınlaşmaq olmur... Yolların vəziyyəti göz önündədir...

Xezerxeber.az xəbər verir ki, yağan yağışlar yollarda tədricən iri çuxurlar yaradıb.

Səkilərin varlığı isə gözə görünmür. Ancaq burada bir yol da var ki, qazıntı işləri aparılıb, amma asfalt bərpa edilmir.

Sakinlərin sözlərinə görə, bu yolda, demək olar ki, hər gün qəza şəraiti yaranır.

Xüsusilə sürücülər vəziyyətdən əziyyət çəkdiklərini deyirlər.

Məsələ ilə bağlı Suraxanı Rayon İcra Hakimiyyəti ilə əlaqə saxladıq. Bildirildi ki, sözügedən küçədə İri Şəhərlərin Birləşmiş Su Təchizatı Xidməti tərəfindən kanalizasiya xətti çəkilib, lakin asfalt örtüyü bərpa olunmayıb. Yolun bərpası ilə bağlı isə aidiyyəti üzrə müraciət edilib. İri Şəhərlərin Birləşmiş Su Təchizatı Xidmətinə də müraciət ünvanladıq. Deyildi ki, araşdırılıb məlumat veriləcək.

Azərbaycan Avtomobil Yolları Dövlət Agentliyindən isə deyildi ki, yollarda hər hansısa qurum tərəfindən görülən işlər yekunlaşdıqdan sonra ərazidə bərpa işlərinin aparılması üçün Agentlik müvafiq müraciətə baxır və asfaltlanma işinə başlanılır.

Xezerxeber.az mövzu ilə bağlı daha ətraflı videomaterialı təqdim edir.