Bölgələrdə ağır qəzalar can aldı VİDEO

Ehtiyatsızlıq qəzaya səbəb olub, nəticədə 2 nəfər ölüb.

Xezerxeber.az xəbər verir ki, hadisə  gecə saatlarında İsmayıllının Qurbanəfəndi kəndi istiqamətində baş verib. İlkin məlumatlara əsasən,  avtomobil yoldan çıxaraq aşıb. Hadisə nəticəsində Oğuz rayon sakinləri 24 yaşlı Səfər  Rəşidov və digər 24 yaşlı  Şükür Şükürlu   dünyasını dəyişib.

Hadisə yerində xilasedicilər cəlb olunub. Aşan  avtomobildəki sərnişinlər deformasiyaya uğramış nəqliyyat vasitəsində sıxılı vəziyyətdə qalıb. Xilasedicilər xüsusi vasitələrlə daha iki nəfəri xilas edərək təcili tibbi yardım briqadasına təhvil veriblər. 27 yaşlı Orxan Rəhimli və 36 yaşlı Tural Allahverdiyev   müxtəlif  dərəcəli bədən xəsarətləri ilə rayon mərkəzi xəstəxanasına çatdırılıb.

Hadisə ilə bağlı cinayət işi başlanılıb, araşdırmalar davam etdirilir.

Kəlbəcərdə də ölümlə nəticələnən yol qəzası olub. Hadisə rayonun bəylik kəndi ərazisində baş verib. Belə ki, rayonun Qamışlı kənd sakini, 50 yaşlı Şahlar Dadaşov idarə etdiyi  avtomobili təxminən yüz metr hündürlükdən dərəyə aşırıb. Qəza zamanı sürücü hadisə yerində həyatını itirib. Avtomobildə olan Bakı şəhər sakini, 33 yaşlı Allahverdi İbrahimbəyli isə  müxtəlif bədən xəsarətləri ilə Kəlbəcər rayonundakı xəstəxanaya yerləşdirilib. Hər iki şəxs tikinti şirkətinin işçiləridir. İlkin ehtimala görə, qəzaya yolun buzlu olması səbəb olub.

Gəncə şəhərində isə  qəzadan sonra avtomobil çaya aşıb. Hadisə şəhərin Azərbaycan bayrağı küçəsində qeydə alınıb. Avtomobillə yük  avtomaşını toqquşub. Zərbənin təsirindən  minik avtomobili Gəncə çayına aşıb. Hadisə zamanı sürücü xəsarətlər alıb. Faktla bağlı araşdırma başlanılıb.

Xezerxeber.az mövzu ilə bağlı daha ətraflı videomaterialı təqdim edir.