Ucarda məktəb binasına qaz xətti çəkilib, amma şagirdlər soyuq otaqlarda dərs keçirlər VİDEO

Bu məktəbin istilik sistemi var, ancaq işləmir. Səbəb isə təhsil ocağının binasına qaz verilməməsidir...

Xezerxeber.az-ın xəbərinə görə, Ucar rayon Qazyan kənd sakinləri deyirlər ki, 2 nömrəli tam orta məktəbdə təhsil alan övladlarına soyuq otaqlarda dərs keçilir.

Sakinlərin sözlərinə görə, sözügedən məktəbin binası təmir edilərək cari ilin oktyabr ayında istifadəyə verilib. Binaya qaz xətti çəkilsə də, istifadəyə verilməyib. Məktəb rəhbərliyi təhsil ocagının  dizel yanacagı ilə qızdırıldıgını desə də, valideyinlər bununla razı deyillər.

Mərkəzi Aran Regional Təhsil İdarəsindən "Xəzər Xəbər"ə bildirildi ki, Ucar rayon Qazyan kənd Əziz Əliyev adına 2 nömrəli tam orta ümumtəhsil məktəbinin istiliklə təminatı dizel yanacağı ilə işləyən istilik sistemi vasitəsilə həyata keçirilir. Sənədləşmə işləri ilə əlaqədar olaraq istiliklə təchizatda fasilə yaranıb.

İdarədən qeyd edildi ki, məktəbin istilik təchizatının ən qısa müddətdə bərpa edilməsi üçün işlər aparılır.

Xezerxeber.az mövzu ilə bağlı daha ətraflı videomaterialı təqdim edir.