Sumqayıtda yaşayış binasında güclü partlayış baş verib, xəsarət alanlar var VİDEO

Bu gün Sumqayıt şəhəri, 13-cü mikrorayon ərazisindəki beşmərtəbəli yaşayış binasında güclü partlayış baş verib.

Xezerxeber.az-ın məlumatına görə, partlayışdan sonra binanın bir hissəsi uçub. Bir neçə nəfər dağıntılar altında qalıb. Binadan qopan beton hissələri həyətdə olan maşınlara da ziyan vurub.

Mənzildə baş vermiş partlayışla əlaqədar dərhal əraziyə Fövqəladə Hallar Nazirliyinin müvafiq qüvvələri cəlb olunub və  axtarış-xilasetmə əməliyyatına başlayıblar.

Xilasetmə işləri günorta saatlarında başa çatıb. İlkin ehtimala görə, hadisəyə qaz sızması səbəb olub.

TƏBİB-dən  verilən xəbərə görə, hadisə yerinə 6 təcili tibbi yardım briqadası cəlb olunub. Xəsarət alan 6 nəfər Sumqayıt Tibb Mərkəzinin nəzdində olan tibb müəssisələrinə təxliyə olunublar. Ağır yanıq xəsarətləri alan 3 nəfərə zəruri tibbi yardımlar göstərilib. Onlar ixtisaslı tibbi yardımın göstərilməsi üçün Bakıdakı Nərimanov Tibb Mərkəzinin nəzdində olan yanıq mərkəzinə köçürülüblər.

Fövqəladə Hallar Nazirliyi və Baş Prokurorluğun birgə məlumatına əsasən   baş verən partlayışlarla bağlı araşdırma aparılır. Partlayışın səbəbinin müəyyən edilməsi istiqamətində zəruri tədbirlər həyata keçirilir.

Bəs binadan təxliyyə edilən ailələrin  aqibəti necə olacaq?

Sumqayıt Şəhər İcra Hakimiyyətindən “Xəzər Xəbər”ə bildirilib ki, orada yaşayan ailələr öz qohum-əqrabalarının  evlərində yerləşiblər. Gələcəkdə hansı addımların atılacağı araşdırımalardan sonra ortaya çıxan nəticədən sonra bəlli olacaq. Aidiyyəti qurumların rəyindən sonra isə bina ya əsaslı təmir olunacaq, ya da söküləcək.

Xezerxeber.az mövzu ilə bağlı daha ətraflı videomaterialı təqdim edir.