Mərhum şahmatçı Vüqar Həşimovun valideynlərinin yaşadığı evdə partlayış baş verib VİDEO

Bu gün mərhum şahmatçı Vüqar Həşimovun valideynlərinin yaşadığı evdə güclü partlayış baş verib.

Xezerxeber.az-ın məlumatına görə, hadisə Sumqayıt şəhəri, Novxanı bağlar massivində fərdi yaşayış evində olub.

Partlayış nəticəsində mərhum şahmat ustasının ata-anası xəsarət alıb, vəziyyətləri ağırdır.

Vüqarın valideynlərinin yaşadığı evdə baş verən bu hadisə çoxlarını kədərləndirdiyi kimi, Vüqarın uçmuş divarlar arasında qalmış şəkli də diqqət çəkib.

Məlumat daxil olan kimi, Fövqəladə Hallar Nazirliyinin xilasediciləri əraziyə cəlb olunub və xilasetmə işlərinə başlanılıb.

Partlayışda xəsarət almış 2 nəfər Sumqayıt Tibb Mərkəzinin nəzdindəki Təcili tibbi yardım xəstəxanasına hospitalizasiya olunub. 75 yaşlı Qasım Həşimova müxtəlif nahiyələrin yanığı diaqnozu, 65 yaşlı

Aidə Həşimovaya isə əzilmiş, cırılmış yaralar diaqnozları təyin edilib. Qasım Həşimov ixtisaslı tibbi yardımın göstərilməsi üçün Nərimanov Tibb Mərkəzinin nəzdindəki yanıq mərkəzinə təxliyə olunub. hazırda digər şəxsin müalicəsi reanimasiya şöbəsində davam etdirilir, vəziyyəti ağırdır.

Partlayışla əlaqədar Fövqəladə Hallar Nazirliyi və Baş Prokurorluq birgə məlumat yayıb. Qeyd edilib ki, baş vermiş partlayışla bağlı araşdırma aparılır.

Xezerxeber.az mövzu ilə bağlı daha ətraflı videomaterialı təqdim edir.