Yol qəzaları iki nəfərin ölümünə səbəb olub, yaralılar var VİDEO

Minik avtomobili ilə motosikletin toqquşması ölüm və ağır xəsarətlərlə nəticələnib.

Xezerxeber.az-ın məlumatına görə, hadisə Neftçala rayonunda baş verib.

Rayonun Sənaye məhəlləsinin yaxınlığından keçən Salyan-Neftçala avtomobil yolunda baş verən qəzada ata ölüb, qızı və nəvələri yaralanıb.

Qoşqulu motosikletin sürücüsü, Bankə qəsəbə sakini 64 yaşlı Ağasəf Mirzəyev, eyni qəsəbənin sakinləri olan sərnişinlər - 38 yaşlı Günel İbrahimova, onun övladları - 14 yaşlı Natiq Fuad İbrahimov, 14 yaşlı Yəhya Fuad İbrahimov, 16 yaşlı Ləman İbrahimova müxtəlif dərəcəli xəsarətlər alıblar.

Yaralılar Neftçala Rayon Mərkəzi Xəstəxanasına yerləşdiriliblər. Lakin həkimlərin səyinə baxmayaraq, 64 yaşlı Ağasəf Mirzəyevin həyatını xilas etmək mümkün olmayıb.

Samux rayonunda 2 nəqliyyat vasitəsinin iştirakı ilə baş vermiş yol-nəqliyyat hadisəsi ölümlə nəticələnib. Hadisə rayonun Əhmədbəyli kənd yolunda qeydə alınıb.

Yük və minik avtomobillərinin toqquşması nəticəsində 39 yaşlı Ceyhun Nəzərov aldığı xəsarətlərdən dünyasını dəyişib.

Hər iki faktla bağlı araşdırma aparılır.

Xezerxeber.az mövzu ilə bağlı daha ətraflı videomaterialı təqdim edir.