Yol qəzaları 3 nəfərin ölümünə səbəb olub, yaralılar var VİDEO

Zərdabda Zəncirvari qəza ölümlə nəticələnib. minik maşını, yük avtomobili və motosikletin iştirakı ilə qəza baş verib. Xezerxeber.az-ın məlumatına görə, hadisə gecə saatlarında Ucar-Zərdab avtomobil yolunun Zərdabın Bəyimli qəsəbəsindən keçən hissəsində qeydə alınıb.

Qəza nəticəsində hər 3 nəqliyyat vasitəsinə ciddi ziyan dəyib. Motosikletin sürücüsü 31 yaşlı Atəş Məmmədov dünyasını dəyişib. Sənani Eyvazov, Ətraf  Xəlilov, Rəşad  Pənahov və Ramal Xəlilov müxtəlif dərəcəli xəsarətlər alıblar. Zərərcəkənlər Zərdab Rayon Mərkəzi Xəstəxanasına yerləşdiriliblər.

Ağstafa rayonundakı qəza nəticəsində isə azyaşlı ölüb. Hadisə rayonun Köçəsgər kəndində qeydə  alınıb. Günün qaranlıq vaxtında uzunqulaq arabası ilə yaşadığı Köçəsgər kəndinə qayıdan 52 yaşlı Ələmdar  İsmaylov öz nəvəsilə bərabər  avtomobil qəzasına düşüb. Avtomobilin arabanı arxadan vurması nəticəsində nəvə - 7 yaşlı Əziz Tağıyev hadisə yerində ölüb.

Ələmdar  İsmaylov Ağstafa Rayon Mərkəzi  Xəstəxanasına  çatdırılıb. Xəstəxanadan verilən məlumata  görə,  52 yaşlı yaralıya  ilkin tibbi yardımdan sonra qan köçürülüb. Bununla belə, onun vəziyyəti ağır  qiymətləndirilir.

Yevlaxda da iki minik maşını toqquşub. Ağır qəza zamanı 46 yaşlı Zamin Rzayev dünyasını dəyişib. 42 yaşlı qadın isə müxtəlif bədən xəsarətləri aldığından xəstəxanaya yerləşdirilib.

Hər üç faktla bağlı araşdırma aparılır.

Xezerxeber.az mövzu ilə bağlı daha ətraflı videomaterialı təqdim edir.