10 gün əvvəl yağan güclü yağışdan istinad divarı uçan məktəb niyə bərpa edilmir? VİDEO

10 gündür uçan məktəb hasarları hələ də bərpa edilməyib... İntensiv yağışlardan sonra hündür divar aşaraq məktəbin həyətinə tökülüb...

Xezerxeber.az xəbər verir ki, söhbət Xətai rayonu, 269 saylı orta məktəbdən gedir. Bakıya bir müddət əvvəl yağan güclü yağış bu məktəbə də ziyan vurub. Ancaq maraqlısı odur ki, xeyli müddət keçməsinə baxmayaraq divar və ara kəsmələrin bərpası ləngiyir.

Həmin ərazidə məktəblə yaşayış kompleksini ayran bu istinad divarının digər hissələri üçün də real təhlükə var.

Məsələ ilə bağlı əvvəlcə Xətai rayon icra hakimiyyəti ilə əlaqə saxladıq.

Qurumdan "Xəzər Xəbər"ə bildirildi ki, problemdən xəbərdardırlar və aradan qaldırılması üçün aidiyəti qurumlara müaciət ünvanlayıblar.

Bakı şəhəri üzrə Təhsil İdarəsindən isə bildirildi ki, 19-22 oktyabr tarixlərində yağan intensiv yağışlar səbəbindən təhsil müəssisələrində yaranmış fəsadların aradan qaldırılması ilə bağlı müvafiq tədbirlər görülməkdədir.

269 nömrəli tam orta məktəbin həyətyanı divarının bərpası üçün hazırlıq-planlama işləri yekunlaşdırılıb və bu gündən hasarın inşasına başlanıb.

Xezerxeber.az mövzu ilə bağlı daha ətraflı videomaterialı təqdim edir.