Bakıda yanğın su hovuzu 6 aydır ki, təhlükəli vəziyyətdədir VİDEO

Bakının Binəqədi rayonu, Abay Kunanbayev küçəsi 16 ünvanında yerləşən ehtiyat su anbarının üzəri çöküb. Nəticədə ərazidə təhlükəli vəziyyət yaranıb.

Xezerxeber.az-ın məlumatına görə, sakinlər deyirlər ki, bura uşaq bağçası və yaşayış binalarının bir addımlığında yerləşir. Həmin su ambarının beton sütunu 6 aydır ki, çöküb. Ancaq hələlik problem aradan qaldırılmayıb və ərazidə təhlükə getdikcə artmaqdadır.

Problemlə bağlı aidiyəti üzrə məlumat verilib.

Binəqədi Rayon İcra Hakimiyyətindən bildirildi ki, həmin su anbarının üzərində avtomobil park edilib. Çökmə də bu səbəbdən baş verib. Bununla belə, ərazidə təhlükəsizlik tədbirlərinin görülməsi üçün və problemin aradan qaldırılması üçün icra hakimiyyəti Fövqəladə Hallar Nazirliyinə yazılı məktub göndərib. İcra hakimiyyətindən o da bildirildi ki, bu gün qurumun əməkdaşları tərəfindən çəkiliş aparılandan sonra təhlükəsizlik tədbirləri görülüb. Quyunun ətrafı lentlənib və yaxınlığında insanların girişi məhdudlaşdırılıb.

Fövqəladə Hallar Nazirliyindən isə bildirildi ki, qeyd olunan yanğın su hovuzunun nasaz vəziyyətdə olması bu qurumun mütəxəssisləri tərəfindən bir neçə ay əvvəl müəyyən edilib və müvafiq tədbirlərin görülməsi üçün cari ilin mart ayında aidiyyəti üzrə Binəqədi Rayon İcra Hakimiyyətinə rəsmi müraciət ünvanlanıb.

Xezerxeber.az mövzu ilə bağlı daha ətraflı videomaterialı təqdim edir.