Binanın 7-ci mərtəbəsindən avtomobilin üzərinə dəmir çən düşüb - İDDİA və CAVAB VİDEO

Abşeron rayonu, Masazır kəndində yeni tikilməkdə olan binadan park edilmiş avtomobilin üzərinə dəmir çən düşüb. Hadisə anı evlərin birinin təhlükəsizlik kamerasına düşüb.

Xezerxeber.az-ın məlumatına görə, bu iddia ilə Masazır kəndində yaşayan sakin çıxış edib.

Avtomobilin sahibi Təbriz Hüseynov bununla əlaqədar müsahibə verməsə də, hadisə baş verən zaman onunla nəqliyyat vasitəsində olan qohumu Aydın Qafarov yaşananları nəql edib.

Aydın Qafarov iddia edib ki, inşası davam edən binada təhlükəsizlik qaydalarına əməl edilmədiyindən məlum hadisə yaşanıb.

Onun iddiasına görə, qarşı tərəf avtomobilin 3 min manatlıq təmir xərclərini ödəməyi öhdəsinə götürsə də, sonradan bundan boyun qaçırıb. İddia edilir ki, bir müddət sonra 300 manat həcmində yardım göstəriləcəyi bildirilib.

Məsələ ilə bağlı MTK-nın sədri İsfəndiyar Axundovla telefon vasitəsilə əlaqə yaratdıq. O bildirdi ki, əgər avtomobilə dəymiş ziyanın məhz onların səhlənkarlığı ucbatından baş verdiyi sübut edilərsə, problemi aradan qaldıracaq.

Artıq hadisə ilə bağlı hüquq-mühafizə orqanlarına müraciət edilib.

Xezerxeber.az mövzu ilə bağlı daha ətraflı videomaterialı təqdim edir: