Binə qəsəbəsində evləri su basıb VİDEO

Bakının Xəzər rayonu, Binə qəsəbəsi, “Südçülük savxozu” ərazisində yolları və məhəlləri yağış suları basıb.

Xezerxeber.az-ın məlumatına görə, sakinlər bildirir ki, ümumiyyətlə sözügedən yaşayış məntəqəsinin yolları bərbad vəziyyətdədir, kanalizasiya şəbəkəsi yoxdur. 

Mövcud vəziyyət səbəbindən sakinlər maşınlarını tez-tez təmir etməli, üstəlik, suyun içərisindən keçməklə məktəbə getmək məcburiyyətində qalan uşaqlarına yeni geyim almalı olurlar. ərazidə yaşayanlar bildirir ki, nəinki ictimai nəqliyyat, yolların pis vəziyyətdə olmasına görə təcili yardım maşınları da əraziyə gəlməkdən imtina edir.

Qardaşxan Əhmədli küçəsinin sakinləri iddia edir ki, aidiyyəti dövlət qurumlarına bununla bağlı bir neçə dəfə müraciət ediblər.

Problemin həlli ilə bağlı Xəzər Rayon İcra Hakimiyyətindən “Xəzər Xəbər”in sorğusuna cavab olaraq bildirildi ki, avtomobil yolu təsərrüfatı sahəsində xidmət göstərilməsi Azərbaycan Avtomobil Yolları Dövlət Agentliyi tərəfindən həyata keçirilir. Bununla əlaqədar olaraq Xəzər Rayon İcra Hakimiyyəti tərəfindən Binə qəsəbəsində istismara yararsız yolların təmiri işlərinin aparılması məqsədilə Agentliyə, həmçinin "Azərsu" ASC-yə rəsmi müraciət ünvanlayıb. O da bildirilb ki, Binə qəsəbəsinin su təminatı, tullantı sularının mərkəzləşdirilmiş qaydada kənarlaşdırılması məqsədilə müvafiq layihə sənədləri tərtib olunuub. Kanalizasiya sistemlərinin inşası tədbirlər planına uyğun mərhələlərlə həyata keçiriləcək.

Xezerxeber.az mövzu ilə bağlı daha ətraflı videomaterialı təqdim edir: