Zaqatalada iki turist itkin düşüb VİDEO

Zaqatalada istirahətə gedən turistlər itkin düşüb.

Xezerxeber.az-ın məlumatına görə, ötən gün Zaqatalaya gələn iki nəfər Bakı sakini Qəbizdərə kəndi ərazisində istirahət edəndən sonra yüksək dağlıq ərazidə yerləşən şəlalə istiqamətində hərəkət ediblər. Bir neçə saat sonra onlarla əlaqə kəsilib.

Turistlərin itkin düşməsi barədə onların yaxınları Fövqaladə Hallar Nazirliyinin qaynar xətt xidmətinə və DİN-in Zaqatala rayon Polis Şöbəsinə məlumat verib. Dərhal əməliyyat qrupu yaradılıb.

Qəbizdərə kənd sakinləri şəlalənin yerləşdiyi ərazinin olduqca təhlükəli olduğunu bildirirlər. Hətta bu ərazilərdə əvvəllər bir-neçə dəfə ölüm hadisələrinin də olduğunu qeyd edirlər.

DİN-in mətbuat xidmətinin Şəki regional qrupunun baş inspektoru polis kapitanı Mahir Məsimov bildirib ki, Zaqatala rayonunun Qəbizdərə kəndində çətin relyefli dağlıq- meşəlik ərazidə köməksiz vəziyyətdə qalan 2 nəfərin olduqları yer müəyyən olunub, onların təxliyə edilməsi istiqamətində tədbirlər həyata keçirilir.

Xezerxeber.az mövzu ilə bağlı daha ətraflı videomaterialı təqdim edir: