İmişlidə yaşayış binasında partlayış baş verib VİDEO

İmişlidə çoxmənzilli yaşayış binasında partlayış baş verib.

Xezerxeber.az-ın məlumatına görə, hadisə səhər saatlarında İmişli şəhəri, Tofiq İsmayılov küçəsində yerləşən 5 mərtəbəli  binanın 2-ci mərtəbəsində olub.

Partlayış nəticəsində 30 yaşlı İlyas  Musayev xəsarət alıb. Hadisə yerinə İmişli rayon Yanğından Mühafizə Hissəsinin texnika və canlı qüvvəsi cəlb edilib. Xəsarət alaraq mənzildə köməksiz qalan həmin şəxs yanğınsöndürənlər tərəfindən xilas edilərək İmişli Rayon Mərkəzi Xəstəxanasına çatdırılıb. Hadisənin qaz sızmasından baş verdiyi ehtimal olunur.

Zərdabda isə ikimərtəbəli yaşayış binası yanıb. Hadisə Etibar Həsənov küçəsində qeydə alınıb.

4 ailənin yaşadığı 13 saylı binada güclü yanğın olub. Hadisə yerinə Fövqəladə Hallar Nazirliyinin Zərdab, Ağcabədi, Ucar rayon Yanğından Mühafizə Hissəsinin texnikası və canlı qüvvəsi cəlb olunub. Ümumi sahəsi 650 kvadratmetr olan tikilinin 400 kvadratmetri əşyaları ilə birlikdə tamamilə, qalan hissəsi isə qismən yanıb.

Yanğın söndürülüb və yaxınlıqdakı tikililər yanğından mühafizə olunub. İlkin ehtimala görə, yanğına səbəb elektrik naqillərində baş verən qısaqapanma olub. Hadisə zamanı ölən və xəsarət alan olmayıb. Hadisə yerinə gələn Zərdab rayon Fövqəladə hallar komissiyasının sədri Ramo Hacıyev yanğın zamanı evsiz qalan 4 ailənin gecələməsi üçün zəruri tədbirlərin görüldüyünü bildirib.

Zaqatalada isə 12 ton ot bağlaması yanıb.

Yanğın hadisəsi rayonun Lahıc kəndində baş verib. Kənd sakini Habil Bayramovun yaşadığı evin həyətyanı sahəsində tikilmiş ümumi sahəsi 120 kv/m olan mal tövləsində anidən yanğın baş verib. Yanğının söndürülməsi üçün əraziyə Fövqaladə Hallar Nazirliyinin Zaqtala rayon Dövlət Yanğından Mühafizə Hissəsinin texnikaları və şəxsi heyətləri cəlb edilib.

Yanğın nəticəsində tövlənin yanar konstruksiyaları, tövlənin çardağına yığılmış 12 ton quru ot bağlaması yanıb, bir baş iribuynuzlu heyvan isə tələf olub. Yaxınlıqdakı digər tikililər yanğından mühafizə olunub.

Faktlarla bağlı araşdırma aparılır.

Xezerxeber.az mövzu ilə bağlı daha ətraflı videomaterialı təqdim edir: