Bakıda atəş açıldı, yaralılar var VİDEO

Bu gün günorta saatlarında Bakıda silahlı insident olub.

Xezerxeber.az-ın məlumatına görə, qanlı cinayət paytaxtın Nəsimi rayonu, Səməd Vurğun küçəsində baş verib.

Ekspertlər hadisə yerindən 3 ədəd odlu silaha məxsus giliz aşkar ediblər.

Daxili İşlər Nazirliyindən verilən məlumata görə, hadisə zamanı 21 yaşlı Fəqan Rəhimli və 40 yaşlı Tamerlan Hüseynov xəsarət alıblar.

Şahidlər silahdan atəş açan şəxsi və ya şəxsləri görmədiklərini deyiblər.

TƏBİB-dən verilən məlumata görə, yaralananların Kliniki Tibbi Mərkəzdə müalicələri davam etdirilir. Tamerlan Hüseynov sol baldırın aşağı üçdə bir hissəsini dəlib keçən güllə yarası diaqnozu ilə mərkəzin Travmatologiya şöbəsinə köçürülüb, vəziyyəti stabildir. Sağ baldırın aşağı üçdə bir hissəsini dəlib keçən güllə yarası diaqnozu qoyulan Fəqan Rəhimlinin vəziyyəti isə orta ağır qiymətləndirilir. Onun Tibb Universitetinin Hərbi tibb fakültəsinin IV kurs tələbəsi olduğu bildirilir.

Baş Prokurorluq və Daxili İşlər Nazirliyinin əməkdaşları ərazidə olan bütün kameraları nəzarətə götürüblər. Daxili İşlər Nazirliyindən verilən məlumata görə, hadisəni törətməkdə şübhəli bilinən 3 nəfər saxlanıb. Qeyd edilib ki, əməliyyat-axtarış tədbirləri davam etdiyi üçün onların adları açıqlanmır.

''Cinayətdə istifadə olunan tapança aşkar olunaraq götürülüb'' - deyə məlumatda bildirilib.

Xezerxeber.az mövzu ilə bağlı daha ətraflı videomaterialı təqdim edir: