Prezident məktəblilərə atasının şəhadətnaməsini nümunə göstərdi VİDEO

Prezident İlham Əliyevin Qırğızıstana dövlət səfəri bu gün də davam edib. Dövlət başçısı Bişkekdə Ulu Öndər Heydər Əliyev və azərbaycanlı mütəfəkkir-şair Nizami Gəncəvinin adını daşıyan məktəblərin açılışlarında iştirak edib.

Prezident İlham Əliyevin Qırğızıstana dövlət səfərinin ikinci günündə qırğız həmkarı Sadır Japarov ilə birlikdə Bişkekdəki "Ala-Arça" Dövlət Təbiət Parkında mədəni proqramda iştirak ediblər... Mədəni proqramda qırğız xalqının milli adət və ənənələri geniş nümayiş olunub.

Daha sonra Bişkekdə Heydər Əliyev adına Məktəb-Gimnaziya təhsil-tərbiyə kompleksinin açılışı olub. Hər iki dövlətin başçıları açılış mərasimində çıxış ediblər. Qırğızıstan Prezidenti Sadır Japarov çıxışında məktəbin açılışının, ikitərəfli münasibətlərdə əlamətdar hadisə olduğunu qeyd edib.

Prezident İlham Əliyev isə bu məktəbin açılışını qardaşlığın rəmzi və Heydər Əliyevin xatirəsinə ehtiram kimi qiymətləndirib. Görkəmli dövlət xadimi kimi Heydər Əliyevin Azərbaycan xalqı qarşısında xidmətlərinin böyük olduğunu deyən Prezident İlham Əliyev ulu öndərin müasir gənclər üçün də nümunə olduğunu vurğulayıb...

Prezidentlər həmçinin Bişkekdə Nizami Gəncəvi adına məktəbin açılış mərasimində də iştirak ediblər.

Bununla da Prezident İlham Əliyevin Qırğızıstana dövlət səfəri başa çatıb. Dövlət başçısını "Manas" Beynəlxalq Hava Limanından qırğız həmkarı Sadır Japarov yola salıb.