Azərbaycanda XÜSUSİ ƏMƏLİYYAT: 19 nəfər tutuldu VİDEO

Baş Narkotiklərlə Mübarizə İdarəsi paytaxt Bakıda narkotik maddələrin qanunsuz dövriyəsinə qarşı əməliyyatlar keçirib. 20 gün ərzində həyata keçirilmiş tədbirlər nəticəsində narkotiklərin satışında şübhəli bilinən 19 nəfər saxlanıb. Həmin şəxslərdən 154 kiloqram narkotik maddə aşkar edilib. Dəstə üzvlərinin azyaşlıları narkokuryerliyə cəlb etdikləri də iddia edilir.

Son 20 gün ərzində keçirilən əməliyyatlar zamanı narkotik maddələrin qanunsuz dövriyyəsində şübhəli bilinən 19 nəfər saxlanıb.

Baş Narkotiklərlə Mübarizə İdarəsinin əməkdaşları tərəfindən Bakı şəhəri və bölgələrdə həyata keçirilən xüsusi əməliyyatlar zamanı əvvəlcə Aqil Ağazadə, Əlizadə Baxşıyev və Əzim Əzimov saxlanıblar. Bu şəxslərdən, idarə etdikləri avtomobillərdən, eləcə də yaşadıqları evlərdən ümumilikdə 103 kiloqram yüksək təsiredici narkotik maddə aşkar olunub. Aşkarlanan narkotik maddələrin 34 kiloqramı heroin, 14 kiloqramı tiryək, 15 kiloqramı metamfetamin, 40 kiloqramı isə marixuana olub. Dəstə üzvlərindən həmçinin elektron tərəzilər, narkotik vasitələrin satışından əldə etdikləri pul vəsaitləri və onlayn satış zamanı istifadə olunan plastik kartlar da aşkar edilib. Məlumata görə onların əsas məqsədi qaçaqmalçılıq yolu ilə ölkəyə gətirilən narkotik vasitələri satmaqla yanaşı, yeni-yeni insanları asan yolla pul qazanmaq adı altında şirnikləndirərək narkokuryerliyə cəlb etmək olub. İddialara görə onlar hətta azyaşlıları da narkokuryerliyə cəlb ediblər.

Qeyd edək ki, Əzim Əzimovun Sabunçu rayonunda yerləşən, suvarma, havalandırma və işqlandırma sistemi ilə təchiz edilən torpaq sahəsindən əlavə olaraq aqrotexniki qaydada qulluq edərək yetişdirdiyi yaş halda çəkisi 2 ton 600 kiloqram olan 3724 ədəd çətənə kolu da aşkar olunub.  Keçirilmiş əməliyyat tədbirlərinin davamı olaraq qeyd edilən dövr ərzində narkotiklərin intensiv satışını  təşkil etməkdə şübhəli bilinən daha 16 nəfər ifşa edilib. Onlardan 51 kiloqram müxtəlif növ narkotik vasitə və iş üçün əhəmiyyət kəsb edən digər maddi sübutlar aşkar olunub.

Ümumilikdə saxlanan 19 nəfərdən 154 kiloqram narkotik vasitə və psixotrop maddə, 1752 ədəd psixotrop tərkibli həb, 3739 ədəd kultivasiya edilərək yetişdirilən çətənə kolu və 33 ədəd "Makarov" markalı tapançaya aid patronlar aşkar olunub. Saxlanan şəxslərin hər biri barəsində həbs qətimkan tədbiri seçilib.