Bakıda məhşur kəşfiyyatçının bir vaxtlar yaşadığı bina qəzalı vəziyyətdədir VİDEO

Sovet dönəminin məhşur kəşfiyyatçısı bakılı Rixard Zorgenin bir vaxtlar yaşadığı evi hazırda qəzalı vəziyyətdədir. İndi bu binada yaşayan sakinlər təhlükə ilə üz-üzə qalıblar.

Xezerxeber.az-ın məlumatına görə, paytaxtın Sabunçu rayonu, Qanboy Vəzirov küçəsi 2 a ünvanında yaşayan sakinlər bu binanın qəzalı olmasından şikayətçidirlər.

Sakinlərin sözlərinə görə, binanın 200 ildən artıq yaşı var və istismar müddətini başa vurub. Ancaq onlar hələ də bu binada yaşamaq məcburiyyətindədirlər.

Sakinlər deyirlər ki, dəfələrlə aidiyyəti qurumlara porblemlə bağlı müraciət ediblər, amma konkret nəticəsi olmayıb.

2015-ci ildə rəsmi qurumlar tərəfindən verilən akta əsasən, bu binanın qəzalı vəziyyətdə və istismar üçün təhlükəli olduğu qeyd olunub. Bununla yanaşı, sakinlərin binadan köçürülməsinin vacib olduğu bildirilib. Ancaq üzərindən  6 il keçməsinə baxmayaraq, hələ də problem həll olunmayıb.

Məsələ ilə bağlı Sabunçu Rayon İcra Hakimiyyətindən bildirilib ki, həmin bina 3 saylı Xususi Təyinatlı Mənzil Kommunal Təsərrüfatı Birliyinin balansındadır.

Birliyin rəis müavini Hacıağa Mircəfərov ''Xəzər Xəbər''ə şifahi olaraq deyib ki, verilən akta əsasən Nazirlər Kabinetinə müraciət olunub. Həmin bina da digər qəzalı binalar kimi mərhələli şəkildə söküləcək.

 Xezerxeber.az mövzu ilə bağlı daha ətraflı videomaterialı təqdim edir: