Bakıda və Kürdəmirdə qətl hadisələri törədilib VİDEO

Kürdəmirdə qardaş bacısını qətlə yetirib.

Xezerxeber.az xəbər verir ki, hadisə Üzeyir Hacıbəyli küçəsində olub.

Aralarında yaranan ailə münaqişəsi zəminində rayon sakini Şıxəliyev Xəyal Təbriz oğlu üç uşaq anası olan 35 yaşlı bacısı Nəsirova Dilarə Təbriz qızına çoxsaylı bıçaq xəsarəti yetirib. Ağır xəsarətlər alan yaralı Kürdəmir Rayon Mərkəzi Xəstəxanasına çatdırılsa da həyatını xilas etmək mümkün olmayıb.

Qonşuların sözlərinə görə, Dilarə Nəsirova bir müddət öncə ailəsində olan münaqişələr zəminində həyat yoldaşından boşanmaq qərarına gəlib. Bu səbəbdən də atası evinə gəlsə də nənəsi tək yaşadığı üçün bir neçə gün imiş ki, onun yanında qalırdı.

Faktla bağlı Kürdəmir Rayon Prokurorluğunda Cinayət Məcəlləsinin qəsdən adam öldürmə maddəsi ilə cinayət işi başlanıb.

Xəyal Şıxaliyev şübhəli şəxs qismində tutularaq istintaqa cəlb edilib. Hazırda iş üzrə zəruri istintaq tədbirləri davam etdirilir.

Bakıda da qətl hadisəsi olub. Tanışını döyüb öldürən şəxs tutulub. Bu barədə Xətai Rayon Prokurorluğu məlumat yayıb.

Ötən gün Məhəmməd Hadi küçəsi 74 ünvanında yaşayan 27 yaşlı Hüseyn Hüseynovun almış olduğu xəsarətlər nəticəsində 3 saylı şəhər kliniki xəstəxanasında ölməsi barədə rayon prokurorluğuna məlumat daxil olub. Aparılan araşdırmalarla müəyyən edilib ki, zərərçəkmişin tanışı, 30 yaşlı Həsən Çəndirli şəxsi münasibətlər zəminində aralarında baş vermiş mübahisə zamanı Hüseyn Hüseynovun bədəninin müxtəlif nahiyələrinə yumruqla xəsarətlər yetirib. Nəticədə Hüseyn Hüseynov aldığı xəsarətlərdən xəstəxanada ölüb.

Faktla bağlı Xətai Rayon Prokurorluğunda ''qəsdən sağlamlığa ağır zərər vurma, ehtiyatsızlıqdan zərərçəkmiş şəxsin ölümünə səbəb olduqda'' maddəsi ilə cinayət işi başlanıb.

Həsən Çəndirli şübhəli şəxs qismində tutularaq istintaqa cəlb edilib.

 Xezerxeber.az mövzu ilə bağlı daha ətraflı videomaterialı təqdim edir: