Bakı, Ağsu və Şamaxıda yanğınlar baş verib VİDEO

Bu gün günorta saatlarında paytaxtın Səbail rayonu, Həsən Seyidbəyli küçəsinin başlanğıc hissəsindəki yamacdakı ağaclıq ərazidə yanğın baş verib.

Xezerxeber.az-ın məlumatına görə, yanğını görən ətrafda yaşayanlar dərhal ''112'' qaynar- xəttə məlumat veriblər.

Əraziyə dərhal Dövlət Yanğından Mühafizə Xidmətinin bir neçə yanğınsöndürən avtomobili və canlı qüvvəsi gəlib.

Yanğınsöndürənlərin müdaxiləsi nəticəsində yanğının geniş əraziyə yayılmasının qarşısı alınıb. Ərazinin qalan hissəsi yanğından mühafizə olunub. Hadisədən sonra ərazidə təmizləmə işləri aparılıb.

Üç gün öncə Ağsu rayonundan başlayan yanğın isə hələ davam edir. Rayonun Gəgəli kəndi yaxınlığında, kol- kos olan yerdə başlayan yanğın böyük bir ərazini əhatə edib. Əraziyə cəlb olunan yanğınsöndürmə briqadası yanğını lokallaşdırsa da, ötən gecədən etibarən  ərazidə kiçik ocaqlar alovlanıb. Ağsu və Şamaxı rayonlarının mürəkkəb relyefi olan dağlıq ərazilərində baş verən yanğın təkrar başlayıb.

Yanğının lokallaşdırılması, söndürülməsi və meşə təsərrüfatlarına keçməsinin qarşısının alınması üçün hadisə yerinə xeyli sayda canlı qüvvə cəlb edilib. Həm Ağsudan gələn yanğınsöndürmə qüvvəsi həm də Şamaxıda gələn Mülki müdafiə qüvvəsi yanğını söndürmək üçün əraziyə cəlb olunub. Cəlb edilən canlı qüvvə, texnika və vasitələr sayəsində çətinliklə də olsa yanğın kifayət qədər azalıb. Şamaxı rayonunun Şərədil kəndinə yaxınlaşan yanğın sakinlərin köməyi ilə də söndürülür.Yanğının tam söndürülməsi istiqamətində  işlər davam etdirilir. Hazırda kiçik və nəzərdən yayınan közlər və ocaq qalıqları  söndürülür. Bunun üçün əraziyə bir ədəd yanğınsöndürən helikopter də cəlb olunub.

Qeyd edək ki, yanğının baş verdiyi əraziyə ekologiya və təbii sərvətlər naziri Muxtar Babayev, Ağsu və Şamaxı rayon icra hakimiyyətlərinin başçıları da baxış keçirib.                                                          

Xezerxeber.az mövzu ilə bağlı daha ətraflı videomaterialı təqdim edir: