Lənkəranda meşəlik ərazidə yanğın baş verib VİDEO

Lənkəranda meşəlik ərazidə baş verən yanğın söndürülüb. Meşə zolağının qalan hissəsi yanğından mühafizə edilib.

Xezerxeber.az xəbər verir ki, yanğın ötən gün Lənkəran rayonunun Osaküçə meşəbəyliyinin ərazisində, Moloja kəndi yaxınlığında başlamışdı. Yanğın zamanı 10 hektar sahədə kol-kos, quru ağaclar və qismən ağaclar yanıb. Yanğın Dövlət Yanğından Mühafizə Xidmətinin yanğından mühafizə bölmələrinin şəxsi heyəti və aviasiya dəstəsinin helikopteri, həmçinin Ekologiya və Təbii Sərvətlər Nazirliyinin Meşə Təsərrüfatı Mərkəzinin əməkdaşları və yerli sakinlər tərəfindən söndürülüb.

Mürəkkəb relyefli dağlıq ərazidə yanğınsöndürmə prosesi çətinliklə başa gəlib, əsasən əl əməyindən istifadə olunub.

Ərazidə yanğın ocaqları tam söndürülənə, təhlükə aradan bütünlüklə qalxana kimi müvafiq qurumların əməkdaşları tərəfindən növbəçilik əsasında nəzarət sistemi tətbiq olunacaq.

Ekologiya və Təbii Sərvətlər Nazirliyindən bildirilib ki, yanğının baş verməsinin ilkin səbəbi antropogen təsirlərdir. İnsanların ehtiyatsızlığı ucbatından belə fəsadlara gətirib çıxarır. İstisna deyil ki, bu, təxribat xarakterli də ola bilər. Hal-hazırda hüquqi qiymətin verilməsi ilə əlaqədar araşdırma aparılır.

Aidiyyəti qurumlar hər kəsi, xüsusilə də meşə ərazilərinə yaxın kəndlərin əhalisini, təbiət qoynunda istirahət edən turistləri, fermerləri və bütün vətəndaşlarımızı hədsiz dərəcədə duyarlı və diqqətli olmağa, odla ehtiyatlı davranmağa, söndürülməmiş siqaret kötüklərini ətrafa atmamağa, biçindən sonra sahələrə od vurmamağa çağırır.

Xezerxeber.az mövzu ilə bağlı daha ətraflı videomaterialı təqdim edir: