Xaçmazda güclü sel bir sıra fəsadlar törədib VİDEO

Xaçmaz rayonunda təsərrüfat sahələri, yollar su altında qalıb.

Xezerxeber.az xəbər verir ki, rayonun Aşağızeyid kəndində Qaraçaya gələn güclü sel küçələri, pomidor sahələrini, həyətyanı sahələri və subartezian quyusunu bərbad hala salıb.

Sakinlər selə görə içməli suya həsrət qalıb.

Aşağızeyidlilər bildirirlər ki, gecə saat 2-də qəfildən lillə dolu sel gəlib. Gecə qəfil gələn lilli su pomidor sahələrini də pis vəziyyətə salıb. Bütün sahələr suyun altında qalıb.

Bütün küçələrə lillə dolu sel axıb. Hətta avtomobil sürmək belə çətinləşib. Mərkəzi küçələrlə yanaşı kənar küçələrin evlərinə də su dolub. Sakinlər evdən çölə çıxa bilmirlər.

Kənd sakinləri bildirirlər ki, kəndə yeni subartezian quyusu vurulub və hələ açılışı olmayıb. Axşam gələn lilli sel quyunu da doldurub. Transformator cərəyan buraxdığına görə quyuya yaxın getmək olmur.

Məsələ ilə bağlı Aşağızeyid Bələdiyyəsinin sədri Tərlan Paşayev "Xəzər Xəbər"ə açıqlamasında bildirdi ki, oxşar vəziyyət artıq 3-4 ildir, təkrarlanır.

Bələdiyyə sədri məsələ ilə bağlı araşdırmanın aparıldığını və hadisənin baş vermə səbəblərinin tezliklə öyrənilməsi istiqamətində işlərin getdiyini vurğulayıb.

Xezerxeber.az mövzu ilə bağlı daha ətraflı videomaterialı təqdim edir: