Yanğınlar Türkiyəyə turist səfərlərinə təsir etdi - İnsanlar tətil vaxtını dəyişir VİDEO

Xüsusilə isti yay günlərində azərbaycanlıların ən çox səfər etdii yerlərdən biri də Türkiyənin Antalya bölgəsidir. Ancaq qardaş ölkədə baş verən hadisələr bu bölgəyə səfər planlaşdıran turistlərə də təsir edib. Bəzi turistlər səfərlərini başqa bir tarixə dəyişiblər. Çox az sayda turist isə turları ləğv etməyi seçiblər. 

Antalya bölgəsində baş verən meşə yanğınları turist səfərlərinə də təsirsiz ötüşməyib. Xüsusilə yanğın ocaqlarına yaxın olan bəzi otellərdən turistlər ərazidə yanğın təhlükəsi olmayan otellərə təxliyə ediliblər.

Turizm üzrə ekspert Murad Əhədzadənin sözlərinə görə, yanğın səbəbindən azərbaycanlı turistlər də narahat olublar. Ekspert bildirir ki, yanğının böyük hissəsi artıq kontrol altına alınıb və bu səbəbdən də yerli turistlərin əksəriyyəti səfərlərinin vaxtını dəyişdirməyi seçiblər

Bununla belə, turpaketlərini ləğv etdirənlər də olub. Ekspert bildirir ki, turpaketdə vaxt dəyşikliyi və ləğv etmə prosesi ilə bağlı türkiyədə otellərlə və oradakı partnyor şirkətlərlə danışıqlar aparılır.

Azərbaycan Turizm Assosiasiyası, Turistlərin Hüquqlarının Müdafiəsi Komitəsinin sədri Rəhman Quliyev isə bildirdi ki, turistər istənilən turpaketi qaytarmaq hüququna malikdir. 

Komitə sədri bildirir ki, problemlə qarşılaşan turistlər Azərbaycan Turizm Assosiasiyası, Turistlərin Hüquqlarının Müdafiəsi Komitəsinə müraciət edə bilərlər

O da bildirildi ki, turpaketlərin qaytarılması üçün turist müqavilənin şərtlərindən asılı olaraq maksimum turpaketin dəyərinin 30%-i qədər cərimə edilə bilər.