Bakıda sərnişin avtobusu yük maşını ilə toqquşub, yaralılar var - VİDEO

Bakıda marşrut avtobusu yük maşını ilə toqquşub, 6 nəfər xəsarət alıb.

Xezerxeber.az-ın məlumatına görə, hadisə bu gün səhər saatlarında Sabunçu rayonu ərazisində, Sabunçu-Zabrat yolunda qeydə alınıb.

217 saylı xətt üzrə hərəkət edən avtobus "Qazel" markalı yük maşını ilə toqquşub. Zərbənin təsirindən yük maşını yol kənarındakı obyektə girib. Dərhal hadisə yerinə təcili tibbi yardım briqadaları cəlb edilib. Yaralılara hadisə yerində ilkin yardım edildikdən sonra, xəstəxanaya aparılıblar.

Hadisə ilə bağlı Səhiyyə Nazirliyi də məlumat yayıb. Bildirilib ki, xəsarət alan 6 nəfərdən 3-ü qadın, 3-ü isə kişi olub.

Xəstəxanada saxlanılan avtobusda olan sərnişin Füzuli Bağırovun ayağı amputasiya edilib. Vəziyyəti ağır qiymətləndirilir.

Bakı Nəqliyyat Agentliyindən isə bildirlib ki, baş verən hadisə ilə bağlı araşdırma aparılır.

Xezerxeber.az mövzu ilə bağlı daha ətraflı videomaterialı təqdim edir: