Xətai rayonunda 30-a yaxın avtomobil qarət edilib- Bir gecədə - VİDEO

Bir gecədə Bakının Xətai rayonunda 30-a yaxın avtomobildən oğurluq edilib. Naməlum şəxs və ya şəxslər ancaq ''Mercedes'' markalı minik avtomobillərinin arxa yan şüşələrini qıraraq pul, telefon və digər qiymətli əşyaları aparıblar.

Xezerxeber.az-ın məlumatına görə, Xətai rayonu General Şıxliniski küçəsi 38 ünvanında yaşayan 9 sakinin avtomobilindən oğurluq olub. Cinayətkalar ancaq həyətlərdə park edilən ''Mercedes'' markalı minik maşınlarını hədəf seçiblər. Zərərçəkmişlərin sözlərinə görə, onlar avtomobillərdən mobil telefon, pul və digər əşyaları aparıblar.

Çəkiliş apardığımız zaman məlum oldu ki, hadisə yerinə yaxın olan Nəsrəddin Tusi küçəsində də bir neçə avtomobildən oğurluq edilib. Həmin ünvandakı minik maşınlarından da eyni üsulla qiymətli əşya və pul aparıblar. Ordakı zərərçəkmişlər də oğurluq edənlərin bir qrup şəxs olduğunu və gecə vaxtı məhlə-məhlə gəzərək silsilə cinayətlər törətdiklərini iddia edirlər.

Hadisə yerinə ərazi üzrə 35-ci polis bölməsinin əməkdaşları gələrək əl-barmaq izləri götürüblər. Polisdən verilən məlumata görə, gecə Xətai rayonu ərazisində 30-a yaxın avtomobilin şüşəsi qırılaraq oğurluq edilib. Polis ərazilərdəki kameralara düşən görüntülər əsasında cinayəti törədən şəxslərin saxlanılması üçün əməliyyat-axtarış tədbirləri görür.

Xezerxeber.az mövzu ilə bağlı daha ətraflı videomaterialı təqdim edir: