VİDEO: Ağsu və Qaradağda ağır qəza: ölən və yaralananlar var

İdarəetməni itirən sürücü səkidə hərəkət edən ər-arvadı vuraraq öldürüb.

Xezerxeber.az məlumat verir ki, ağır yol-nəqliyyat hadisəsi ötən axşam Ağsuda Heydər Əliyev prospektində qeydə alınıb. Şamaxı sakini Əmirşah Ədilov idarə etdiyi jiquli markalı minik avtomobili ilə sürətlə hərəkətdə olarkən idarəetməni itirib, avtomobil yoldan çıxaraq piyada səkisində hərəkət edən iki nəfəri - Ağsu sakini Xəyyam Əliyevi və onun həyat yoldaşı Xatirə Əliyevanı vurub. Ağır xəsarətlər alan ər və arvad hadisə yerində ölüblər.

Piyadaları vuran avtomobil sonra hasara çırpılaraq aşıb. Zərbənin təsiri nəticəsində avtomobilin sürücüsü Əmirşah Ədilov, onun həyat yoldaşı Məhbubə Ədilova, övladları - Əmrah və Afaq Ədilovlar müxtəlif dərəcəli bədən xəsarətləri ilə rayon Mərkəzi Xəstəxanasına yerləşdirilib. Hazırda onların vəziyyəti ağır olaraq qalır.

İki nəfərin xəsarət alması ilə nəticələnən başqa bir qəza isə paytaxtın Qaradağ rayonu xarici dairəvi yolda olub. Eyni istiqamətdə hərəkətdə olan 3 minik avtomobilinin toqquşması zamanı avtomobildə olan Pənah Savalanov və onun azyaşlı qızı xəsarət alıb.

Hadisə yerinə gələn təcili yardım avtomobili ata və onun azyaşlı uşağına yardım edib. Yüngül xəsarat alanlar evə buraxılıb. Hadisə yerinə gələn polis isə qəzaya uğrayan hər üç avtomobili cərimə meydançasına aparıb. Qəzanın dəqiq səbəbi avtoekspertizadan sonra məlum olacaq.

Xezerxeber.az mövzu ilə bağlı daha ətraflı videomaterialı təqdim edir: