VİDEO: Yol qəzaları yenə can aldı: 5 nəfər ölüb, yaralılar var

Təcili tibbi yardım maşını yük maşınına çırpılıb. Qəza zamanı 1 nəfər ölüb.

Xezerxeber.az məlumat verir ki, hadisə bu gün səhər saatlarında Bakı- Qazax əsas magistral yolunun 187-ci kilometrliyində, Kürdəmir rayon ərazisində baş verib.  Tural Süleymanovun idarə etdiyi Ucar  Mərkəzi Rayon Xəstəxanasına məxsus   təcili tibbi yardım maşını ilə Qalib Hüseynovun idarə etdiyi  markalı yük maşını toqquşub. Zərbənin gücündən təcili yardım maşını yanmağa başlayıb.

Nəticədə  təcili tibbi yardım maşınında  olan sərnişin, Ucar rayon sakini 54 yaşlı Şəhla Əzizova hadisə yerində ölüb. Sürücü Tural Süleymanov və digər sərnişinlər, Xəyalə  Mehdiyeva, tibb bacısı Validə  Xəlilova müxtəlif xəsarətlərlə Kürdəmir Mərkəzi Rayon Xəstəxanasına yerləşdiriliblər.

Hadisə yerinə  Kürdəmir Rayon Yanğından Mühafizə Hissəsinin əməkdaşları  cəlb olunublar. Yanğın səbəbindən yol bir neçə saat  bağlı qalıb.

Ağır qəzalardan biri də gecə Ağcabədidə olub. İki minik avtomobilinin  toqquşması nəticəsində sürücülərdən biri,  Daşkəsən rayon Əhmədli kənd sakini, 22 yaşlı Faiq Qurbanov  hadisə yerində ölüb. digər sürücü, Ağcabədi rayon sakini Əli Abdullayev  Ağcabədi Mərkəzi rayon Xəstəxanasına çatdırılsa da, aldığı yaradan həyatını itirib. Ağcabədi Mərkəzi rayon Xəstəxanasından  verilən xəbərə görə, sərnişin olan 20 yaşlı gəncin həyatını xilas etmək mümkün olub.

Bu gün günorta saatlarında Masallının Qəriblər kəndi ərazisində də  ağır yol qəza hadisəsi baş verib. Hadisə zamanı Masallı şəhər sakini, 45-yaşlı Mübariz Bağırovun   idarə etdiyi avtomaşın rayonun Qəriblər kənd sakini, 51yaşlı Rövşən Əmənovun  idarə etdiyi  avtomobillə toqquşub.

Toqquşma zamanı hər iki maşına ciddi ziyan dəyib. Hadisə zamanı  sürücüsü 51 yaşlı Rövşən Əmanov və sərnişin, Təhminə Hacıyeva aldıqları çoxsaylı bədən xəsarətlərindən hadisə yerində dünyasını dəyişiblər. Müxtəlif dərəcəli bədən xəsarətləri almış digər sürücü və  sərnişin 13-yaşlı Zeynəb Həmzəyeva isə Masallı Mərkəzi rayon Xəstəxanasına yerləşdirilib.

İlkin versiya kimi qəzanın yüksək sürət səbəbindən baş verdiyi bildirilir.

Xezerxeber.az mövzu ilə bağlı daha ətraflı videomaterialı təqdim edir: