VİDEO: Avtomobil 3 nəfərin həyatına son qoydu

Avtomobil iki azyaşlı qardaşı vurub, onlardan biri ölüb.

Xezerxeber.az məlumat verir ki, hadisə Quba rayonunun Rustov kəndində baş verib. Axşam saatlarında Mehman Musayev öz avtomobili ilə hərəkətdə olarkən yol kənarında oynayan 4 yaşlı Renat və qardaşı 10 yaşlı Xəqani Qurbanovu vurub. Renat hadisə yerində ölüb. Onun qardaşı isə ağır bədən xəsarətləri ilə Quba Rayon Mərkəzi Xəstəxanasına yerləşdirilib.

Yaxınlarının iddiasına görə, ölən azyaşlıya vaxtında tibbi yardım göstərilməyib. Təcili yardım xidmətinə müraciət olunsa da, vaxtında gəlməyib. Nəticədə azyaşlı dünyasını dəyişib.

Quba Rayon Mərkəzi Xəstəxanasından isə bildirilib ki, hadisə yerinə çağırış olunan kimi təcili yardım maşını əraziyə yollanıb. Faktla bağlı Quba rayon Polis şöbəsində araşdırma aparılır.

Beyləqanda da  avtomobil piyadanı öldürüb.

Rayonun Dünyamalılar kəndində kənd sakini Zülfüqar Orucov idarə etdiyi avtomobil ilə yolu keçən həmkəndlisi Tariyel İbrahimovu vurub. Nəticədə piyada hadisə yerində ölüb. Faktla bağlı Beyləqan rayon Polis şöbəsi tərəfindən araşdırma aparılır.

Bərdə rayonunda da bənzər qəza baş verib. Rayonun Qaradəmirçi kəndində Bərdə sakini Şöhrət Süleymanov  avtomobil ilə gedərkən yolu keçən kənd sakini Gülnar Ağayevanı vurub. Yaralı qadın təcili tibbi yardım avtomobili ilə  xəstəxanaya catırılsa da, yolda ölüb. Hadisə ilə bağlı araşdırmalar davam etdirilir.

Xezerxeber.az mövzu ilə bağlı daha ətraflı videomaterialı təqdim edir: