Lənkəranda evləri su yudu - İnsanlar təxliyə edilib - VİDEO

Ötən gün axşam saatlarında Lənkəran çayının daşması nəticəsində rayonun Sütəmurdov, Velədi kəndləri və şəhərin çaykənarı məhəllələri su altında qalıb.

Xezerxeber.az-ın məlumatına görə,bəzi həyətlərdə suyun səviyyəsi bir metrdən yuxarı olub. Rayonun Sütəmurdov kəndində, Lənkəran çayına yaxın ərazilərdə yaşayan ailələr qayıqlarla evlərdən təxliyə olunub. Axın güclü olduğundan xilasedicilər motorlu qayıqlardan istifadə ediblər. Rayonun Velədi kəndində isə su basmış ərazilərdə qalanlar yerli sakinlərin köməyi ilə evlərdən çıxarılıb.

Rayonun dağ kəndlərindən Şovu və Molla kənd ərazisində çay kənarında olan 2 ev su yuyaraq aparıb.

Yagıntılar zamanı torpaq qatının axması nəticəsində Lənkəran-Lerik yolu tamamilə bağlanıb. Əraziyə cəlb edilən texnikalar vasitəsi ilə yol təmizlənib və avtomobillərin hərəkəti bərpa edilib.

Rayonda elektrik təsərrüfatlarında baş verən qəzalara görə Lənkəranın əksər əraziləri bir neçə saat işıqsız qalıb.

Masallıda isə Boradigah çayının məcrasından çıxması səbəbindən Boradigah qəsəbəsində yüzə yaxın yaşayış evinin həyətyanı sahəsi və bəzi evlərin zirzəmiləri su altında qalıb. Sakinlərin sözlərinə görə, xeyli ev quşlarını su yuyaraq aparıb.

Qəsəbədaxili yollarda suyun səviyyəsinin bir metrə qədər yüksəlməsi həm avtomobillərin, həm də piyadaların işini çətinləşdirib.

Rayon icra hakimiyyəti tərəfindən əraziyə ağır texnika və canlı qüvvə cəlb edilib.

Sel Şamaxıda da ziyanla ötüşüb.

Hadisə ilə baglı aidiyyatı qurumlara məlumat verilib.

Xezerxeber.az mövzu ilə bağlı daha ətraflı videomaterialı təqdim edir: