Bir gecənin faciəsi: 2 obyekt, 60 minlik mal - VİDEO

Gecə Bakıda bazar yanıb. Sabunçu rayonunda baş verən hadisə zamanı bir neçə mağaza və kafe yanaraq yararsız hala düşüb. Nəticədə sahibkarlara xeyli ziyan dəyib. Hadisənin qısa qapanmadan baş verdiyi ehtimal edilir.

Elektrik naqillərində baş verən qısa qapanma bazarda yanğına səbəb olub.

Hadisə gecə, paytaxtın ''Sabunçu Bazar''ında baş verib. Əslidar Məmmədəliyev küçəsindəki bazarda yanğın güclü olduğundan vətəndaşlar dərhal yanğınösndürənlərə məlumat veriblər. Hadisə yerinə dövlət yanğından mühafizə bölməsinin canlı qüvvəsi və 7 yanğınsöndürən avtomobili cəlb edilib.

Çox çəkməyib ki, alovun qarşısı alınıb. Hadisə zamanı bazarın ərazisindəki 4 kafe, bir gözəllik salonu və 2 mağaza yanıb. Hadisə ilə əlaqədar Fövqəladə Hallar Nazirliyi də məlumat yayıb. Bildirilir ki, vətəndaşa məxsus ümumi sahəsi 65 kvadratmetr olan mağazanın yanar konstruksiyaları, başqa bir şəxsə məxsus gözəllik salonu və bitişik mağazaların dam örtükləri yanıb. Bitişik digər mağazalar yanğından mühafizə olunub.

Hadisə zamanı xəsarət alan olmasa da, obyekt sahiblərinə xeyli maddi ziyan dəyib. Mağazalardakı əşyalar yanaraq külə dönüb.

Bazar rəhbərliyindən verilən məlumata görə, obyekti yanan sahibkarlara müəyyən miqdarda kömək olunacaq. Yanğının səbəbinə gəldikdə isə onlar bunun elektrik qısaqapanmasından olduğunu ehtimal edirlər. Fövqəladə Hallar Nazirliyinin əməkdaşları yanan mağazalardan nümunələr götürüblər ki, hadisənin əsl səbəbini müəyyən etsinlər.