Göyçayda avtobus yandı VİDEO

Ötən gecə Göyçay rayonunda sərnişin avtobusu yanıb.Hadisə yerinə Göyçay Dövlət Yanğından Mühafizə Hissəsinin 3 yanğınsöndürən avtomobili və canlı qüvvəsi cəlb edilib. Şəhərin mərkəzində baş verən yanğın söndürülüb və ətrafdakı avtobuslar, inzibati bina, ticarət mərkəzi və evlər yanğından mühafizə edilib. Rayon sakini, Bəhram Səfəraliyevə məxsus 50 yerlik sərnişin avtobusunun mühərrik yeri və salonu tamamilə yanaraq yararsız hala düşüb.Şəxsi avtobusu ilə Göyçay-Bakı marşrutu üzrə sifarişlər əsasında sərnişin daşıyan Bəhram Səfəraliyev bildirib ki, onun nəqliyyat vasitəsini qəsdən yandırıblar. Onun sözlərinə görə, 2 gün öncə Bakıdan rayona qayıdaraq avtobusu qarajda saxlayıb və evə gedib. Ötən gecə ona "Göyçay-Avtonəqliyyat" ASC-nin gecə növbətçisi ona zəng edərək deyib ki, avtobus naməlum səbəbdən əvvəlcə işə düşüb, sonra qabağa və arxaya hərəkət edib və içərisində qəflətən baş verən partlayış səbəbindən yanmağa başlayıb.Polis əməkdaşları hadisə yerinə və təhlükəsizlik kamerası vasitəsilə yanğının baş vermə anına baxıblar. Faktla bağlı araşdırma aparılır.