Ucarda baş verən yanğın söndürülüb YENİLƏNİB

Fövqəladə Hallar Nazirliyinin “112” qaynar telefon xəttinə Ucar rayonu, 28 may küçəsində yerləşən bazar ərazisində yanğın baş verməsi barədə məlumat daxil olub.

Xezerxeber.az xəbər verir ki, məlumatla əlaqədar dərhal FHN-in Dövlət Yanğından Mühafizə Xidmətinin Ucar, Ağdaş və Göyçay rayon Yanğından Mühafizə hissələrinin qüvvələri əraziyə cəlb olunub.

Hadisə yerində əməliyyat şəraiti qiymətləndirilərkən yanğının bazar ərazisində bir-birinə bitişik tikilmiş obyektlərdə baş verdiyi və yayılma riskinin yüksək olduğu müəyyən olunub.

Yanğınsöndürənlərin operativ müdaxiləsi sayəsində yanğın genişlənərək daha böyük sahəyə yayılmasına, o cümlədən yaxınlıqdakı evlərə keçməsinə imkan verilmədən söndürülüb.

Yanğın nəticəsində ümumi sahəsi 2510 kv.m. olan bazar ərazisində bir-birinə bitişik tikilmiş 8 müxtəlif təyinatlı mağazanın yanar konstruksiyaları 270 kv.m. sahədə yanıb.

Bazarın böyük hissəsi və yaxınlıqdakı yaşayış evləri yanğından mühafizə olunub.

18:52

Ucar rayonunda bazarda yanğın baş verib.

Xezerxeber.az xəbər verir ki, hadisə rayon mərkəzindəki pərakəndə və topdan satış mərkəzində qeydə alınıb.

Yerli sakinlərin sözünə görə qəflətən başlayan yanığının əhatə dairəsi genişlənib. Alovun qarşısını almaq üçün əraziyə Fövqəladə Hallar Nazirliyinin Dövlət Yanğından Mühafizə İdarəsinin Ucar, Göyçay və Ağdaş bölmələrinin canlı qüvvə və texnikası cəlb edilib.

Alovun söndürülməsi və ətraf ərazilərin yanğından mühafizəsi üçün tədbirlər həyata keçirilir.