Azərbaycana idxal edilən avtomobillərin sayı açıqlanıb

Bu ilin yanvar-sentyabr aylarında Azərbaycana 744 milyon ABŞ dolları dəyərində 55 199 ədəd müxtəlif təyinatlı avtomobil idxal olunub.

Xezerxeber.az xəbər verir ki, bu barədə Dövlət Gömrük Komitəsindən bildirilib.

Məlumata görə, ötən ilin eyni dövrü ilə müqayisədə idxal edilən avtomobillərin dəyəri 12,7 % artsa da, sayı 15 % azalıb.

Bu dövrdə idxal edilən minik avtomobillərinin sayı 51 055 ədəd, hibrid mühərrikli avtomobillərin sayı 8999, elektrik mühərrikli avtomobillərin sayı isə 301 ədəd təşkil edib.

Bu avtomobillərin 8 999-u (105,4 milyon ABŞ dolları dəyərində) daxili yanma mühərriklə yanaşı, elektrik mühərriklə də hərəkətə gətirilən nəqliyyat vasitələri, 301-i (10 milyon ABŞ dolları dəyərində) isə yalnız elektrik mühərriklə hərəkətə gətirilən nəqliyyat vasitələridir.

Başqa sözlə, minik avtomobillərinin sayı 16%, hibrid avtomobillərin sayı 2,5 % azalsa da, ölkəyə idxal edilən elektromobillərin sayı 3,2 dəfə artıb.

Bundan əlavə, yük avtomobillərinin idxalı 13% azalaraq 3 585 ədəd, xüsusi təyinatlı motorlu nəqliyyat vasitələrinin idxalı isə 98,2 % artaraq 222 ədəd olub.