Azərbaycan və Türkiyə gömrük orqanları qarşılıqlı əməkdaşlığı inkişaf etdirir

Azərbaycanın Türkiyədə səfirliyindəki Dövlət Gömrük Komitəsinin (DGK) nümayəndəsi (gömrük attaşesi) Əliqulu Cəfərov Ankara şəhərində, Türkiyənin Ticarət Nazirliyinin Gömrük Mühafizə Xidməti İstihbarat Baş İdarəsinin rəisi Oğuz Serkant Akın, Narkotiklərlə Mübarizə Baş İdarəsinin rəisi Osman Yıkım, Layihə və Texniki Sistemlər Baş İdarəsinin rəisi Adnan Akgöz ilə görüş keçirib.

Komitədən bildirilib ki, iki qardaş ölkənin yüksələn xətlə inkişaf edən əlaqələrinin vurğulandığı görüşdə qeyd edilib ki, istər Vətən müharibəsi zamanı, istərsə də post-müharibə dövründə Türkiyənin Azərbaycana güclü siyasi və mənəvi dəstəyi ölkələrimizin daim bir-birinin yanında olmasına bariz nümunədir.

Ötən il DGK-nin sədri, gömrük xidməti general-polkovniki Səfər Mehdiyevin İzmir şəhərində türkiyəli həmkarı ilə keçirdiyi görüşün qarşılıqlı əməkdaşlığın inkişafına töhfə verdiyi deyilib, eləcə də səfər çərçivəsində Azərbaycan, Gürcüstan və Türkiyə gömrük xidməti rəhbərləri arasında imzalanan sənədin ölkələrimiz arasında ticarətin asanlaşdırılması, tranzit potensialının artırılması və regional iqtisadi inteqrasiyaya yardım edilməsi baxımından əhəmiyyəti vurğulanıb.

Görüşdə Azərbaycan gömrüyünün müasir texnologiyalardan istifadə etməklə ticarət yolları üzərində səmərəli nəzarət sistemini formalaşdırdığı, Azərbaycan gömrük orqanlarının həyata keçirdiyi əməliyyat-axtarış tədbirləri nəticəsində 2019-2021-ci illər ərzində 6 ton 523 kiloqram narkotik vasitə və psixotrop maddənin qanunsuz dövriyyədən çıxarıldığı, o cümlədən 2021-ci ildə 3 ton 43 kiloqram narkotik vasitə və psixotrop maddənin gömrük sərhədindən keçirilməsinin qarşısının alındığı barədə məlumat verilib.

Türkiyə gömrükçüləri Azərbaycan gömrük orqanlarının narkotik vasitə və psixotrop maddələrin qanunsuz dövriyyəsi ilə mübarizədə əldə etdikləri nailiyyətləri yüksək qiymətləndirib və birgə əməkdaşlığın daha da inkişaf etdirilməsinin önəmini bildiriblər.

Sonra cinayətkar qrupların narkotik vasitə və psixotrop maddələrin dövlət sərhədindən keçirilməsində istifadə etdikləri forma, üsul və metodlar, həmçinin gömrük hüquqpozmalarına qarşı mübarizə sahəsində qarşılıqlı məlumat mübadiləsinin aparılması haqqında müzakirələr keçirilib.

Görüşün sonunda türkiyəli həmkarlara “Zəfər Salnaməsi” adlı kitab və “Qarabağ Azərbaycandır” nişanlı medalyon hədiyyə edilib.