Türkiyədə aralarında azərbaycanlı da olan 42 nəfər saxlanılıb

Türkiyədə Azərbaycan da daxil olmaqla, 12 ölkə tərəfindən İnterpol xəttilə qırmızı bülletenlə axtarışa verilən 42 nəfər "Kfaes-31" əməliyyatı ilə saxlanılıb.

Xezerxeber.az xəbər verir ki, bu barədə Türkiyənin daxili işlər naziri Ali Yerlikaya "X" sosial şəbəkəsində məlumat verib.

Axtarış elan edən ölkələr siyahısına Azərbaycanla yanaşı, İran, Rusiya, Qazaxıstan, Özbəkistan, Qırğızıstan, Türkmənistan, Bosniya və Herseqovina, Almaniya, İsveç, Finlandiya və Misir daxildir.

Nazirin sözlərinə görə, axtarışda olan şəxslər Türkiyənin Ankara, Antalya, Bursa, Ərzurum, Əskişəhər, Kırklareli, Hatay, İstanbul, İzmir, Mersin, Niğde, Sakarya və Uşak şəhərlərində saxlanılıb, əməliyyatlar davam edir.

Qeyd olunub ki, saxlanılan şəxslər mütəşəkkil cinayətkar qruplaşmalara üzvlük, qanunsuz silah alveri, narkotik vasitələrin ticarəti, qəsdən adam öldürmə, miqrant qaçaqmalçılığı, maliyyə fırıldaqçılığı, soyğunçuluq və oğurluq, sənədlərin saxtalaşdırılması, vergidən yayınma kimi cinayətlərdə şübhəli bilinirlər.