Volodimir Zelenski: Rusiya ilə münaqişənin yeni mərhələsi başlayır

Qışın gəlişi ilə Rusiya-Ukrayna müharibəsində yeni mərhələnin başlanğıcına start verilib.

Xezerxeber.az xəbər verir ki, Ukrayna Prezidenti Volodimir Zelenski bu barədə "Associated Press" agentliyinə müsahibəsində deyib.

“Qış fəsli yeni mərhələnin başlanğıcıdır. Silah çatışmazlığı səbəbindən istənilən nəticənin əldə edilmədiyi yay əks-hücumundan sonra soyuqlar döyüş əməliyyatlarında çətinliklər yaradacaq”, - deyə Volodimir Zelenski bildirib.

Onun sözlərinə görə, istənilən nəticəyə tez bir zamanda nail olmaq mümkün deyil, lakin bu o demək deyil ki, “biz təslim olmalıyıq”.

O, komandanlığın yayda başlayan əks-hücumdan daha çox şey gözlədiyini, lakin nəticələrin qənaətbəxş olmadığını etiraf edib.

"Biz daha sürətli nəticələr əldə etmək istəyirdik. Bu baxımdan, təəssüf ki, istədiyimiz nəticələrə nail olmadıq. Bu, faktdır", - Vladimir Zelenski bildirib.

O əlavə edib ki, Ukrayna Silahlı Qüvvələrinin “dünyanın ikinci ordusu” ilə döyüşərkən geri çəkilmədiyinə sevinir.

Prezident, həmçinin qeyd edib ki, İsrailin Qəzzada müharibəyə başlaması Ukrayna ətrafında yaranan vəziyyəti kölgə altında qoya bilər.