Qara dənizdə batan gəminin yeddi ekipaj üzvünün axtarışı davam edir

Ötən həftə Türkiyə ərazisində hökm sürən güclü külək səbəbindən Qara dənizdə batan gəminin ekipaj üzvlərindən beşinin cəsədi tapılıb.

Xezerxeber.az xəbər verir ki, gəminin digər yeddi ekipaj üzvünün axtarışları davam edir.

Xatırladaq ki, noyabrın 19-da Qara dənizdə Türkiyə bayrağı altında üzən “Kafkametler” adlı gəmi fırtınadan qorunmaq üçün Ereğli limanına yan alıb. Rusiyadan İzmir vilayətinin Əliağa limanına yük daşıyan gəmi orada lövbər sala bilməyərək yenidən hərəkətə keçib. Qısa müddət sonra onunla əlaqə kəsilib.

Qeyd edək ki, havadan, qurudan və sudan davam edən axtarışlara çox sayda dalğıc və mütəxəssislə yanaşı, 300-ə yaxın texnika - təyyarələr, helikopterlər, patrul qayıqları və pilotsuz uçuş aparatları cəlb olunub.