Paşinyandan Rusiyanın əli ilə mümkün inqilab iddialarına MÜNASİBƏT

"Ermənistanda inqilabı xalq etdi".

Xezerxeber.az "Sputnik Armenia"ya istinadən xəbər verir ki, bunu baş nazir Nikol Paşinyan "Ermənistanda Rusiyanın təşəbbüsü ilə mümkün inqilab" ilə bağlı hər hansı narahatlığının olub-olmadığı barədə suala cavabında deyib.

Paşinyan parlamentdə sual-cavab sessiyasında bildirib ki, ölkədə “Vaqner” döyüşçülərinin olması ilə bağlı xəbərlərə hüquq-mühafizə orqanları reaksiya verməlidir:

"Ermənistanın hüquq-mühafizə orqanları mediada yer alan yazılara cavab verməlidir. Bildiyimə görə, bu, cinayət-prosessual məcəllədə də normadır. "Telegram" kanallarında belə bir xəbər çıxıb. Milli Təhlükəsizlik Xidməti öz səlahiyyətləri daxilində dərc edilmiş bu məlumatları yoxlayır", - Baş nazir deyib.

Qeyd edək ki, ötən həftə bir sıra Ermənistanın hökumətyönlü sosial media səhifələrində bu ölkədə guya "Vaqner"in 3000-dək döyüşçüsünün olduğu və yerli qüvvələrin dəstəyi ilə dövlət çevrilişi həyata keçirərək Baş naziri vəzifəsindən uzaqlaşdıracağı barədə məlumatlar yayılıb.