Avropa İttifaqı İrana qarşı yeni sanksiyalar tətbiq edəcək

Avropa İttifaqı etirazları amansızcasına yatırdığına görə İrana qarşı sanksiyaları sərtləşdirmək niyyətindədir.

"Ukrinform" xəbər verir ki, bunu Almaniya kansleri Olaf Şolts deyib.

“İnsan həyatına qarşı bu qəddarlıq və nifrət üçün təkcə sözlər kifayət etmir, ona görə də biz tədbirlər görürük. Avropa İttifaqı artıq bir neçə sanksiya paketi təqdim edib. Diqqət öz xalqına qarşı bu zorakılığa görə məsuliyyət daşıyanlara yönəlib. Gələn həftə sanksiyalara yeniləri əlavə olunacaq. Biz İnqilab Keşikçiləri Korpusuna və siyasi rəhbərliyə təzyiqləri artırmaqda davam edəcəyik”, - deyə Almaniya kansleri bildirib.

Berlin günahkarların məsuliyyətə cəlb edilməsi üçün sübutların toplanması səylərini dəstəkləyir. Olaf Şoltsun sözlərinə görə, İran rejiminin cinayətlərinin araşdırılması üçün BMT-nin İnsan Haqları Komitəsinin xüsusi sessiyasının çağırılması planlaşdırılır. İran BMT-nin üzvüdür və üzərinə insan hüquqlarının qorunması və dəstəklənməsi öhdəliyi götürüb.

AFR kansleri, həmçinin xatırladıb ki, İran Rusiyanı Ukrayna şəhərlərinə hücum edən və dinc sakinləri öldürən pilotsuz təyyarələrlə təchiz edir.

“Bütün bunlar tamamilə qəbuledilməzdir. Biz zorakılığa dərhal son qoymağa çağırırıq. Biz siyasi məhbusları və jurnalistləri azad etməyə çağırırıq”, - deyə Olaf Şolts əlavə edib. O vurğulayıb ki, İran xarici işlər nazirinin bu mövqeyə görə Almaniyaya qarşı təhdidləri Berlini İran xalqına verdiyi dəstəkdən çəkindirməyəcək.

KİV-də yayılan məlumatlara görə, “əxlaq polisi” tərəfindən saxlanılan Məhsa Əmininin ölümü ilə əlaqədar etirazlarda iştirak edən 300-dən çox insan öldürülüb, 14 mindən çox insan həbs edilib.