Yaponiya hökuməti yeni koronavirusun yayılması təhlükəsi ilə bağlı 2011-ci il zəlzələsi qurbanlarının xatirəsinə həsr edilən anım mərasiminin ləğv olunması barədə qərar qəbul edib.
Bu barədə qərar Nazirlər Kabinetinin martın 6-da keçirilən iclasında qəbul olunub.
Xəbər verdiyimiz kimi, faciənin 9-cu ildönümünə həsr edilən anım mərasiminin martın 11-də keçirilməsi planlaşdırılırdı.
Xatırladaq ki, həmin vaxt baş vermiş təbii fəlakət və atom qəzası nəticəsində Yaponiyanın şimal-şərqində 20 mindən çox insan həlak olub.
Əlavə olaraq bildirilir ki, martın 11-də Nazirlər Kabinetində Baş Nazir Şinzo Abe daha az insanın iştirakı ilə həlak olanların xatirəsini bir dəqiqəlik sükutla anacaq. Həmin mərasimdə Baş Nazirin çıxış edəcəyi də qeyd edilir. (AZƏRTAC)