Bill Qeyts 24 illik mövqeyini itirdi

Forbes bu il 37-ci dəfə dərc etdiyi "Ən varlı 400 amerikalı" siyahısını açıqlayıb.

ABŞ-ın ən varlı adamı bir ildə sərvətinə 78,5 milyard əlavə edərək ümumi sərvətini 160 milyard dollara çatdıran "Amazon"un icraçı direktoru Cef Bezos oldu.

"Forbes 400"ün keçən il 2,7 trilyon dollar olan ümumi sərvəti, bu il 2,9 trilyon dollara yüksəlib. 24 il ərzində siyahının ilk sırasında yer alan "Microsoft"un banisi Bill Qeyts isə 97 milyard dollarlıq sərvətiylə siyahıda ikinci sırada qərarlaşıb.

"Berkshire Hathaway"ın sahibi investor Uorren Buffett isə 88,3 milyard dollarlıq sərvətiylə ABŞ-ın ən varlı üçüncü şəxsidir.

Ötən illə müqayisədə sərvəti 10 milyard dollar azalan feysbuk rəhbəri Mark Zukerberq 61 milyard dollarlıq sərvətiylə dördüncüdür. Beşinci isə 58,4 milyard dollarla "Oracle"ın banisi Larri Elisson olub.

ABŞ prezidenti Donald Tramp isə siyahıda 259-cu yerə düşüb. Keçən il siyahıda 248-ci olan Trampın 3,1 milyard dolları var.