Bərə faciəsində ölənlərin sayı 126 nəfərə çatıb

Tanzaniyada sərnişin bərəsinin Viktoriya gölündə batması nəticəsində azı 126 nəfər həlak olub.

Xezerxeber.az xəbər verir ki, bu barədə Tanzaniyanın nəqliyyat naziri İsaak Kamvelvey deyib.  Məlumatda qeyd olunur ki, təcili xidmətlərin əməkdaşları axtarış-xilasetmə işlərini davam etdirirlər.

Qəza zamanı bərənin göyərtəsində olan sərnişinlərin dəqiq sayını indiyədək müəyyənləşdirmək mümkün olmayıb. Şahidlərin sözlərinə görə, faciə qurbanlarının sayı 200-ü ötə bilər. Belə bərələr adətən yüzlərlə insan daşıyır və çox vaxt həddən artıq yüklənir.

Xilasetmə əməliyyatlarının iki günü ərzində batmış gəmidən 37 nəfər xilas edilib. Yerli hakimiyyət orqanları ölənlər arasında xarici ölkə vətəndaşlarının olmadığını bildirirlər.

Xatırladaq ki, bərə sentyabrın 20-də Yukora adasından 50 metr məsafədə qəzaya uğrayaraq batıb.