Nazir müavini: Təhsilə ayrılan vəsait kifayət deyil

"2021-ci ildə bir nəfərin təhsil almasına sərf olunan orta xərc 1767 manat təşkil edib. Təhsil pillələri üzrə təbii ki, bu fərqlidir. Ən böyük göstərici ali təhsildədir -2604 manat".

Xezerxeber.az xəbər verir ki, bunu təhsil nazirinin müavini İdris İsayev Milli Məclisin İqtisadi siyasət, sənaye və sahibkarlıq komitəsinin iclasında deyib.

Nazir müavini bildirib ki, peşə təhsilində bir nəfərin təhsil almasına sərf olunan orta xərc 1567 manat və ümumitəhsil pilləsində 1125 manatdır: "Bu vəsait bizə beynəlxalq standartlara uyğun təhsilin təşkil edilməsi üçün kifayət etmir. İlk növbədə biz bu sahədə digər ölkələrin göstəricilərinə diqqət yetiməliyik. Bizim göstəricimiz digər ölkələrdən dəfələrlə, təxminən 2-3 dəfə aşağıdır. Təbii ki, təhsil xəcləri artmalıdır. Bu artım tendensiyası artıq bir neçə ildir müşahidə edilir. Biz yenə də bunun üzərində işləyirik".