Novruz bayramında əhali ən çox hara üz tutur? - Ölkədə turizmlə bağlı SON VƏZİYYƏT

Novruz bayramı ilə əlaqədar olaraq Azərbaycana turist axını məsələsi də aktuallaşır. Eyni zamanda yerli turistlər də bayram tətilini keçirmək üçün adətən bölgələrə üz tuturlar. 

Maraqlıdır, bayram ərəfəsində Azərbaycana daha çox hansı ölkələrdən turistlər gəlir? Yerli turistlər istirahət üçün hansı bölgələrə üstünlük verir? 

Mövzu ilə bağlı Sfera.az-a danışan Azərbaycan Turizm Agentlikləri Assosiasiyasının nümayəndəsi Göydəniz Qəhrəmanov bayram ərəfəsində Azərbaycana daha çox ərəb ölkələrindən turistlərin gəldiyini bildirib:

"Azərbaycana hazırda daha çox ərəb ölkələrindən turistlər gəlir. Keçən ilə nisbətdə bu ölkədən gələn turistlərin sayı indi daha çoxdur. Bu da pandemiya ilə əlaqədardır. Düzdür, indiki nəticə 2018-2019-cu illərlə eynilik təşkil etmir, lakin ümumilikdə turist axınında canlanma var. Təəssüflər olsun ki, Rusiya və Ukraynadan müharibə səbəbilə ölkəmizə gələn turistlərin sayı azalıb, birbaşa reyslər dayandırılıb. Ümid edirik ki, yay aylarına doğru iki ölkə arasında münaqişə bitər və həmin ölkələrdən də turistləri qəbul edə bilərik”. 

Ekspert yerli turistlərin üz tutduğu bölgələrin adlarını da açıqlayıb:

"Novruz tətili ilə bağlı isə paytaxt Bakıdan daha çox regionlara üz tuturlar. Artıq bəzi bölgələrin otellərində canlanma var. Yerli turistlər adətən Şamaxı, Şəki, Qəbələ, İsmayıllı, Qax, Lənkəran, Masallı, Quba və Qusar istiqamətinə səfər edirlər.  Lakin bu, yalnız Novruz tətili müddəti üçün aktualdır, çünki bayramdan sonra bölgələrə səfərlər azalır”.