Bakı-2015: İki güləşçimiz finalda! – CANLI YAYIM

Yarımfinalda 75 kq çəki dərəcəsində təmsilçimiz Elvin Mürsəliyev Gürcüstan idmançısı Zurabi Datunaşvili ilə qarşılaşıb. İlk set idmançımızın xeyrinə bitib. İkinci raundda da üstünlüyünü qoruyan idmançımız finala vəsiqə qazanıb (3:2).

130 kq çəki dərəcəsində yarımfinalda çıxış edən yunan-Roma güləşçimiz Sabah Şəriətinin rəqibi Belarus idmançısı gürcüstan əsilli İoseb Çuqoşvili  olub.

Sabah Şəriəti rəqibini  6:0 hesabı ilə məğlub edərək finala vəsiqə qazanıb.

Birinci Avropa Oyunlarının ikinci gününün bütün finalçıları müəyyənləşib. Belə ki, rusiyalı Artyom Surkov (66 kq) Ermənistan idmançısı Miqran Arutyunyan, gənclər arasında dünya çempionu Elvin Mürsəliyev (75 kq) serbiyalı Viktor Nemes, ukraynalı Jan Belenyuk (85 kq) Rusiya güləşçisi David Çakvetadze, Azərbaycan çempionu Sabah Şəriəti (130 kq) isə türkiyəli idmançı Rza Kayaalp ilə üz-üzə gələcək.

Dünya və Avropa çempionu Həsən Əliyev isə bürünc medal uğrunda mübarizə aparacaq.

14:39

Güləşçimiz Sabah Şəriəti birinci Avropa Oyunlarının finalına vəsiqə qazanıb. Pəhləvanımız qızıl medal uğrunda görüşdə türkiyəli Rza Kayaalp ilə qarşılaşacaq.

14:32

Avropa və dünya çempionumuz Həsən Əliyev birinci Avropa Oyunlarının yarımfinal mərhələsinə yüksəlib. Gürcüstanlı Saçino Davitaya, Xorvatiya idmançısı Daniel Janeciçi və Mixail Siamionaunu (Belarus) məğlub edən Həsən Əliyev yarımfinalda ermənistanlı Miqran Arytunyan ilə üz-üzə gələcək.

14:32

Avropa çempionatının gümüş mükafatçısı və yeniyetmələr arasında dünya çempionu Elvin Mürsəliyev birinci Avropa Oyunlarının dörddəbir final mərhələsinə yüksəlib. İonel Puskaunu (Rumıniya) mübarizədən kənarlaşdıran güləşçimizin növbəti rəqibi Gürcüstan təmsilçisi Zurabi Datunaşvilidir.

11:51

Avropa və dünya çempionumuz Həsən Əliyev birinci Avropa Oyunlarında ikinci qələbəsini qazanıb. Gürcüstanlı rəqibi Saçino Davitayanı məğlub edən Həsən Əliyev səkkizdəbir final mərhələsində Xorvatiya idmançısı Daniel Janeciçdən üstün olub. Dörddəbir final mərhələsində güləşçimizin rəqibi Mixail Siamionau (Belarus) olacaq.

Saman Təhmasibi (85 kq) italiyalı Fabio Parisi məğlub edərək birinci Avropa Oyunlarının səkkizdəbir final mərhələsinə yüksəlib. Onun növbəti rəqibi Ermənistan güləşçisi Maksim Manukyandır.

11:18

Avropa çempionatının gümüş mükafatçısı və yeniyetmələr arasında dünya çempionu Elvin Mürsəliyev Heydər Əliyev adına İdman Sarayındakı azarkeşlərimizi sevindirib. Slovakiya güləşçisi Riçard Riqo üzərində qələbə qazanan pəhləvanımız səkkizdəbir final mərhələsində Mateuz Volnı (Polşa)-İonel Puskau (Rumıniya) qarşılaşmasının qalibi ilə üz-üzə gələcək.

10:58

Həsən Əliyev birinci Avropa Oyunlarına qələbə ilə başlayıb. Avropa və dünya çempionumuz gürcüstanlı rəqibi Saçino Davitayanı məğlub edərək səkkizdəbir finala yüksəlib. Güləşçimizin növbəti rəqibi Xorvatiya idmançısı Daniel Janeciç olacaq.

10:30

Bakı, 14 iyun, Səxavət Quliyev, Rəşad İsmayılov, AZƏRTAC

“Bakı-2015” birinci Avropa Oyunları davam edir. 

AZƏRTAC xəbər verir ki, yarışın ikinci günündə 66, 75, 85 və 130 kiloqram çəki dərəcəsində yunan-Roma güləşçiləri mübarizə aparırlar.

Güləşçilərimizin ilk rəqibləri müəyyənləşib. Həsən Əliyev (66 kq) gürcüstanlı Saçino Davitaia, Elvin Mürsəliyev (75 kq) Slovakiya təmsilçisi Riçard Riqo, Saman Təhmasibi (85 kq) italiyalı Fabio Parisi, Sabah Şəriəti (130 kq) isə Ukrayna güləşçisi Mikola Kuçmi ilə qarşılaşacaq.

Yunan-Roma güləşi

66 kq

Dünya və Avropa çempionumuz Həsən Əliyev mübarizəyə təsnifat mərhələsindən başlayacaq. 25 yaşlı pəhləvanımız ilk görüşündə gürcüstanlı Saçino Davitaya ilə qüvvəsini sınayacaq.

75 kq

Yığmamızın aparıcı üzvlərindən Elvin Mürsəliyev də yarışa ilk mərhələdən qoşulacaq. O, slovakiyalı Riçard Riqo ilə üz-üzə gələcək.

85 kq

Millimizin liderlərindən olan Saman Təhmasibi ilk döyüşdə italiyalı Fabio Parisi (İtaliya) ilə qüvvəsini sınayacaq. O, mərhələ adlayarsa, Maksim Manukyan (Ermənistan) – Artur Omarov (Çexiya) cütünün qalibi ilə güləşəcək.

130 kq

Komandamızın ən ağır çəkili pəhləvanı Sabah Şəriəti 1/8 finalda Mikola Kuçmi ilə güləşəcək.

Qeyd edək ki, yunan-Roma yarışın ilk günündə Rəsul Çunayev (71 kq) qızıl, Rafiq Hüseynov (80 kq) gümüş və Elman Muxtarov (59 kq) bürünc medal qazanıb.