Stepkoya gümüş medalı Mehriban Əliyeva təqdim etdi

Milli Gimnastika Arenasında idman gimnastikasının çoxnövçülük yarışlarında iki hərəkət üzrə qaliblərin mükafatlandırılması mərasimi keçirilib.

Gimnastika atında hərəkətlərdə Azərbaycan təmsilçisi Oleq Stepko (14,600) gümüş medala sahib olub. Qızıl medalı Sloveniyalı Saso Bertoncej (14,966), bürünc medalı isə İngiltərəli Brin Bevan (14,200) əldə edib.

Sərbəst hərəkətlərdə İspaniyalı Zapata Santana (15,333) ən yüksək nəticə göstərərək qalib olub. Almaniyalı Fabian Hamburken (15,100) ikinci olub, Rusiyalı David Belavski (15,000) üçüncü yerə layiq görülüb.

Qadınlar arasında dayaqla tullanma hərəkətlərdə isə qızıl medal İsveçrəli Guliya Stengburgerə (14,999) nəsib olub. Gümüş medalı rusiyalı Seda Tutkalyan (14,683), bürünc medalı isə Niderland gimnastı Lisa Top (14,016) qazanıb.

Qaliblərə medalları "Bakı-2015" birinci Avropa Oyunları Təşkilat Komitəsinin sədri Mehriban Əliyeva təqdim edib.

Qızıl medal qazanmış ölkələrin himni səsləndirilib, dövlət bayraqları ucaldılıb.