Bakı-Sumqayıt istiqamətində hərəkət edən qatarların sayı artırılıb VİDEO

Bu gündən Bakı-Sumqayıt istiqamətində hərəkət edən qatarların sayı artırılıb.

Xezerxeber.az-ın məlumatına görə, "Azərbaycan Dəmir Yolları" Qapalı Səhmdar Cəmiyyəti sərnişin sıxlığının qismən tənzimlənməsi məqsədilə bu gündən etibarən Abşeron dairəvi dəmiryol marşrutu üzrə qatarların qrafikini optimallaşdırıb.

Qurumdan bildirilib ki, bu marşrut üzrə həftənin iş, şənbə və bazar günləri ümumilikdə 61 reys əlavə olunub. İş günləri və ya həftəiçi reyslərin sayı 66-dan 92-yə çatdırılıb, xüsusən günorta saatlarında qatarlararası interval azaldılıb. Eyni zamanda, Bakı-Xırdalan-Sumqayıt istiqamətində saat 20:20 reysi əlavə olunub, əvvəlki qrafiklə isə sonuncu qatar 19:35-də idi.

Bundan başqa, Sumqayıt-Xırdalan-Bakı istiqamətində səhər reysləri optimallaşdırılıb. Belə ki, bu vaxtadək saat 07:20-də Sumqayıtdan çıxan qatar Bakıya 08:01-də çatırdı. Yeni qrafiklə saat 06:15-də çıxan qatar Bakıya 06:56-da çatır. Həmçinin bu istiqamətdə səhər saatlarında hərəkət edən ekspres tipli qatara Biləcəri və Xırdalan stansiyalarında dayanacaq verilib.

Abşeron dairəvi marşrutu üzrə ilk dəfə olaraq yeni qatar da istifadəyə verilib.

Optimallaşdırma çərçivəsində həftənin şənbə və bazar günləri üçün də xüsusi qrafik tərtib olunub. Yeni cədvələ əsasən, şənbə günlərində Bakı-Xırdalan-Sumqayıt-Bakı marşrutu üzrə reyslərin sayı 10-dan 16-ya, Bakı-Pirşağı-Sumqayıt-Bakı xətti üzrə reyslərin sayı 20-dən 36-ya çatdırılıb. Bazar günləri isə Bakı-Xırdalan-Sumqayıt-Bakı marşrutu üzrə reyslərin sayı 10-dan 15-ə, Bakı-Pirşağı-Sumqayıt-Bakı xətti üzrə reyslərin sayı 20-dən 28-ə qədər artırılıb.

Xezerxeber.az mövzu ilə bağlı daha ətraflı videomaterialı təqdim edir.