Bakıda tikinti şirkəti sakinlərin rahatlığını pozur - ŞİKAYƏT və CAVAB VİDEO

Bakının Yasamal rayonu, Fuad İbrahimbəyov küçəsində tikinti işlərinin gecə saatlarında aparılması ətrafda yaşayan sakinləri narahat edir.

Xezerxeber.az-ın məlumatına görə, sakinlər üzləşdikləri problemlə bağlı həm tikinti şirkətinə, həm də müvafiq qurumlara məlumat verdiklərini, lakin tədbir görülmədiyini deyirlər.

Şikayətçilərin sözlərinə görə, ərazidə həm də orta məktəb yerləşir. Səs-küy dərs prosesinə də mane olur.

Məsələ ilə bağlı ərazidə tikinti aparan “Nizami City” şirkəti ilə əlaqə saxladıq.

Şirkətdən "Xəzər Xəbər"ə bildirildi ki, bazar və bayram günləri iş aparılmayıb. İş səhər 9-dan axşam saatlarına qədər davam edir. Gecə saatlarında səs-küyün olmasına gəldikdə isə, qeyd olundu ki, qanunla ağır texnikanın şəhərə buraxılmasına axşam saat 10-dan sonra icazə verildiyi üçün gecə saatlarında da iş aparılıb.

Sakinlər isə bildiriblər ki, bu günə qədər bayram günləri ərəfəsində də gecə saatlarında ərazidə iş aparılıb.

Xezerxeber.az mövzu ilə bağlı daha ətraflı videomaterialı təqdim edir.