Güclü külək Qaxda fəsadlar törədib VİDEO

Güclü külək Qaxda bir sıra fəsadlar törədib.

Xezerxeber.az-ın məlumatına görə, rayonun Lələpaşa kəndində fərdi yaşayış evinin dam örtüyünün uçması nəticəsində bir ailə evsiz qalıb.

Dünən axşam saatlarından başlayaraq rayon ərazisində qeyri-sabit hava şəraiti hökm sürüb, fasilələrlə güclü külək əsib və yağış yağıb. Külək rayonun Lələpaşa kəndində Nahid Əzizxanova məxsus fərdi yaşayış evinin dam örtüyünü qopararaq 100 metr aralıda əkin sahəsinə atıb. Evin dam örtüyü qopduqdan sonra bəzi otaqların tavanı da dağılaraq evin içərisinə tökülüb. Nəticədə ev əşyalarına ziyan dəyib, yağış suları evin içərisinə dolub.

Kənd bələdiyyəsindən bildirilib ki, vətəndaşın evinə dəymiş ziyanla bağlı ərazidə olublar və evə baxış keçirilib.

Qeyd edək ki, güclü külək Qazmalar və Qaşqaçay kəndində iki vətəndaşa məxsus tövlənin dam örtüyünü də qoparıb. Qax rayonunun bır sıra kəndlərində elektrik təsərrüfatına ziyan dəyib, elektrik enerjisinin verilməsində fasilələr yaransa da daha sonra bərpa edilib.

Xezerxeber.az mövzu ilə bağlı daha ətraflı videomaterialı təqdim edir.