Yol-nəqliyyat hadisələri iki piyadanın ölümünə səbəb oldu VİDEO

Gəncədə 76 yaşlı kişini avtomobil vuraraq öldürüb.

Xezerxeber.az-ın məlumatına görə, hadisə şəhərin Nizami Gəncəvi prospektində qeydə alınıb.

Hərəkətdə olan minik maşını yolu qarşı tərəfə keçmək istəyən 76 yaşlı Yunis İsayevi vurub. Piyada xəstəxanaya aparılıb, lakin onun həyatını xilas etmək mümkün olmayıb.

Qəza ilə bağlı araşdırma aparılır.

Şəkidə də avtomobil piyadanı vuraraq öldürüb. Hadisə Şəki-Qax avtomobil yolunun Şəki rayonunun İnçə kəndindən keçən hissəsində qeydə alınıb.

Gecə 01:00 radələrində İsmayıl Piriyev idarə etdiyi avtomobillə yolu keçən piyada, 69 yaşlı Cəmaləddin Abdullayevi vurub. Nəticədə Cəmaləddin Abdullayev aldığı xəsarətlərdən hadisə yerində ölüb. 

Daxili İşlər Nazirliyinin Mətbuat xidmətinin Şəki regional qrupundan bildirilib ki, faktla bağlı cinayət işi başlanılıb, istintaq aparılır.

Masallıda isə ağırtonnajlı yük maşınının aşması Ələt-Astara magistralında hərəkətin qismən çətinləşməsinə səbəb olub.

Dağıstan Respublikasına aid olan ağırtonnajlı yük avtomobili Astaradan Bakı istiqamətində hərəkətdə olarkən Masallı ərazisində aşıb. Polis əməkdaşları tərəfindən sürücülər alternativ yola istiqamətləndirilib.

Əraziyə aidiyyəti qurumların nümayəndələri cəlb olunub. Yük avtomobili yoldan götürülüb. 

Qeyd edək ki, yük avtomobili İrandan Rusiyaya tərəvəz məhsulları aparırmış. Qəza nəticəsində xəsarətalan olmayıb. Faktla bağlı araşdırma aparılır. 

Xezerxeber.az mövzu ilə bağlı daha ətraflı videomaterialı təqdim edir.