Sərnişinlər Sumqayıt-Corat-Novxanı bağları istiqamətində işləyən avtobuslardan narazıdır VİDEO

Sumqayıt şəhərindən Corat və Novxanı bağları istiqamətində fəaliyyət göstərən 4 nömrəli marşrut xətti üzrə işləyən avtobuslardan sakinlər narazıdır. Onların sözlərinə görə, avtobusların son vaxtlar gec-gec işləməsi bir sıra çətinliklər yaradır.

Xezerxeber.az-ın məlumatına görə, ərazidə cəmi bir marşrut xətti üzrə avtobuslar fəaliyyət göstərir.

O da gec-gec işlədiyindən sakinlər ciddi çətinliklərlə üzləşirlər.

Sakinlərin sözlərinə görə, ərazidə fəaliyyət göstərən 4 nömrəli marşrut avtobusları ilə Sumqayıt şəhərinin mərkəzinə getmək müşkülə çevrilir. Bu səbəbdən bəzən taksilərdən istifadə etmək məcburiyyətində qalırlar.

Məsələ ilə bağlı Sumqayıt Şəhər İcra Hakimiyyəti nəzdindəki "Nəqliyyat" MMC-dən "Xəzər Xəbər"ə bildirilib ki, Sumqayıt Corat və Novxanı bağları istiqamətində fəaliyyət göstərən 4 nömrəli marşrut xətti ilə işləyən 3 ədəd avtobus var. Həmin avtobuslar idarə tərəfindən tərtib olunmuş intervalla əhaliyə xidmət göstərir. Gələcəkdə isə avtobus sayının artırılması nəzərdə tutulur.

Xezerxeber.az mövzu ilə bağlı daha ətraflı videomaterialı təqdim edir.